પાકિસ્તાન જશે વિદેશ મંત્રી એસ જયશંકર, જાણો શા માટે જઈ રહ્યા છે પાડોશી દેશ

વિદેશ મંત્રી ડૉ એસ જયશંકર SCO સમિટમાં ભારત વતી ભાગ લેવા માટે પાકિસ્તાન જશે. આ બેઠક 15-16 ઓક્ટોબર 2024ના રોજ પાકિસ્તાનની રાજધાની ઈસ્લામાબાદમાં યોજાશે. જેમાં એસ જયશંકર ભારતનું પ્રતિનિધિત્વ કરશે. વિદેશ મંત્રાલયના પ્રવક્તા રણધીર જયસ્વાલે આજે (04 ઓક્ટોબર) આ માહિતી આપી હતી.

આ બેઠકમાં સભ્ય દેશો વચ્ચે ક્ષેત્રીય સુરક્ષા, આર્થિક સહયોગ અને અન્ય આંતરરાષ્ટ્રીય મુદ્દાઓ પર ચર્ચા કરવામાં આવશે. જયશંકરની આ મુલાકાત ભારત અને પાકિસ્તાન વચ્ચેના દ્વિપક્ષીય સંબંધોના સંદર્ભમાં મહત્વપૂર્ણ માનવામાં આવી રહી છે. આ SCO બેઠક પ્રાદેશિક સ્થિરતા અને સહયોગને પ્રોત્સાહન આપવાના ઉદ્દેશ્યથી યોજાઈ રહી છે, જેમાં ચીન, રશિયા અને મધ્ય એશિયાઈ દેશો સાથે ઘણા મોટા મુદ્દાઓ પર ચર્ચા કરવામાં આવશે.

જયશંકરની હાજરી આ પ્રાદેશિક મંચમાં ભારતની ભૂમિકા અને પ્રભાવને પણ મજબૂત કરશે. પરંતુ હવે જ્યારે જયશંકરના જવાની પુષ્ટિ થઈ ગઈ છે, ત્યારે બધાની નજર તેમના પર પણ રહેશે.

ભારતના નેતા કેટલા વર્ષ પછી પાકિસ્તાન જશે?

પાકિસ્તાન સાથેના બગડતા સંબંધો વચ્ચે ઘણા વર્ષોથી કોઈ ભારતીય નેતાએ પાકિસ્તાનની સત્તાવાર મુલાકાત લીધી નથી. 2014માં નરેન્દ્ર મોદી વડાપ્રધાન બન્યા બાદ પાકિસ્તાન સાથે સંબંધો સુધારવાનો પ્રયાસ શરૂ થયો હતો અને PM મોદી 25 ડિસેમ્બર 2015ના રોજ લાહોરમાં નવાઝ શરીફને પણ મળ્યા હતા. આ પછી તત્કાલીન વિદેશ મંત્રી અને હવે દિવંગત નેતા સુષ્મા સ્વરાજ પાકિસ્તાનની મુલાકાતે ગયા હતા. ત્યારપછી સરકારના કોઈ મંત્રીએ પાકિસ્તાનની મુલાકાત લીધી નથી.