ડોનાલ્ડ ટ્રમ્પે PM મોદીને જન્મદિવસની શુભેચ્છા પાઠવી, યુક્રેન-રશિયા યુદ્ધને લઈને થઈ વાતચીત

અમેરિકાના રાષ્ટ્રપતિ ડોનાલ્ડ ટ્રમ્પે પ્રધાનમંત્રી નરેન્દ્ર મોદીને તેમના 75મા જન્મદિવસ પર અભિનંદન આપવા માટે ફોન કર્યો. પ્રધાનમંત્રી મોદીએ આ બદલ આભાર વ્યક્ત કર્યો. પીએમ મોદીએ ટ્વીટ કર્યું, "મારા મિત્ર, મારા 75મા જન્મદિવસ પર તમારા ફોન અને શુભેચ્છાઓ બદલ આભાર. તમારી જેમ, હું ભારત-અમેરિકા વૈશ્વિક ભાગીદારીને નવી ઊંચાઈઓ પર લઈ જવા માટે સંપૂર્ણપણે પ્રતિબદ્ધ છું. અમે યુક્રેન સંઘર્ષના શાંતિપૂર્ણ ઉકેલ તરફ તમારી પહેલને સમર્થન આપીએ છીએ."

પીએમ મોદી 17 સપ્ટેમ્બરના રોજ 75 વર્ષના થયા. તેમણે કહ્યું કે ટ્રમ્પે મંગળવારે રાત્રે 10:53 વાગ્યે તેમને ફોન કર્યો હતો. ટ્રમ્પે રાત્રે 11:30 વાગ્યે તેમના સોશિયલ મીડિયા પ્લેટફોર્મ ટ્રુથ પર પીએમ સાથેની વાતચીત વિશે માહિતી આપી હતી.

ટ્રમ્પે લખ્યું, 'મારા મિત્ર, વડા પ્રધાન નરેન્દ્ર મોદી સાથે હમણાં જ ખૂબ સરસ ફોન પર વાતચીત થઈ. મેં તેમને જન્મદિવસની ખૂબ ખૂબ શુભેચ્છાઓ પાઠવી! તેઓ ખૂબ જ સુંદર કામ કરી રહ્યા છે. નરેન્દ્ર, રશિયા અને યુક્રેન વચ્ચેના યુદ્ધને સમાપ્ત કરવામાં તમારા સહયોગ બદલ આભાર.'

ટ્રમ્પ ટેરિફ પછી ભારત-અમેરિકા સંબંધોમાં થોડો તિરાડ પડી હતી, પરંતુ આ તણાવ ધીમે ધીમે ઓછો થઈ રહ્યો છે. બંને દેશો વચ્ચેના સંબંધો હવે સામાન્ય થઈ રહ્યા છે. ભારત અને અમેરિકાએ મંગળવારે વેપાર કરાર પર ચર્ચા કરી. વાટાઘાટો બાદ ભારતે એક નિવેદન બહાર પાડ્યું. ભારતે જણાવ્યું કે બધું સકારાત્મક હતું. યુએસ ચીફ નેગોશીયેટર બ્રેન્ડન લિંચે ખાતરી આપી હતી કે ભારત સાથેના સોદામાં કોઈ અવરોધો રહેશે નહીં.

ભારતના અધિક સચિવ રાજેશ પણ બેઠકમાં હાજર હતા. વેપાર ભાગીદારી અને દ્વિપક્ષીય વેપાર કરારો સંબંધિત મુખ્ય મુદ્દાઓ પર ચર્ચા કરવામાં આવી હતી. મંગળવારે યોજાયેલી આ બેઠકમાં બંને પક્ષોએ દ્વિપક્ષીય વેપાર કરાર (BTA) ના પ્રથમ તબક્કાને નવેમ્બર સુધીમાં પૂર્ણ કરવા અંગે વાત કરી. આ સાથે, એ પણ નક્કી કરવામાં આવ્યું કે છઠ્ઠા રાઉન્ડની વાતચીત ક્યારે શરૂ થશે અને કયા મુદ્દાઓ પર ચર્ચા થશે.