ટ્રમ્પને ઝટકો, મોટાભાગના ટેરિફને ગેરકાયદે ઠરાવતી કોર્ટ

કટોકટી હેઠળની સત્તાઓમાં ટેરિફ અથવા ડ્યૂટી લાદવાની સત્તા નથી: ચૂકાદાથી પ્રમુખને મોટો ફટકો

યુએસ ફેડરલ અપીલ કોર્ટે ગઇકાલે કટોકટી સત્તા હેઠળ રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા મોટાભાગના ટેરિફને ગેરકાયદેસર જાહેર કર્યા. આ નિર્ણયને ટ્રમ્પની વેપાર નીતિ પર સીધો ફટકો માનવામાં આવી રહ્યો છે અને હવે તેના પર આગામી કાનૂની લડાઈ સુપ્રીમ કોર્ટમાં થવાની સંભાવના છે.

વોશિંગ્ટન ડીસી સ્થિત યુએસ કોર્ટ ઓફ અપીલ્સ ફોર ધ ફેડરલ સર્કિટે 7-4ના નિર્ણયમાં જણાવ્યું હતું કે, કાયદો રાષ્ટ્રીય કટોકટીની સ્થિતિમાં રાષ્ટ્રપતિને ઘણા પગલાં લેવાની મંજૂરી આપે છે, પરંતુ તેમાં ટેરિફ અથવા ડ્યુટી લાદવાની સ્પષ્ટ સત્તા શામેલ નથી. ન તો તેમને કર લાદવાનો અધિકાર છે. કોર્ટે કહ્યું કે ટ્રમ્પે આંતરરાષ્ટ્રીય કટોકટી આર્થિક શક્તિ અધિનિયમ (IEEPA) હેઠળ પોતાની સીમાઓ ઓળંગી છે, જે 1977નો કાયદો છે જે પરંપરાગત રીતે પ્રતિબંધો અને સંપત્તિ જપ્તી માટે ઉપયોગમાં લેવાય છે.

આ નિર્ણય એપ્રિલમાં ટ્રમ્પ દ્વારા તેમના વેપાર યુદ્ધના ભાગ રૂૂપે લાદવામાં આવેલી પારસ્પરિક ફરજોને લાગુ પડે છે. તે ફેબ્રુઆરીમાં ચીન, કેનેડા અને મેક્સિકો પર લાદવામાં આવેલા ટેરિફને પણ લાગુ પડે છે. જો કે, સ્ટીલ અને એલ્યુમિનિયમ જેવા અન્ય ટેરિફ જે અલગ કાયદા હેઠળ લાદવામાં આવ્યા હતા તે નિર્ણયથી પ્રભાવિત થશે નહીં.

ટ્રમ્પ વહીવટીતંત્રે દલીલ કરી હતી કે IEEPA હેઠળ આયાતને નિયંત્રિત કરવાની શક્તિ ટેરિફ લાદવા સુધી વિસ્તરે છે. પરંતુ કોર્ટે આ દલીલને ફગાવી દીધી, કહ્યું કે કાયદામાં ટેરિફ અથવા ડ્યુટીનો પણ ઉલ્લેખ નથી, ન તો તેના માટે કોઈ સ્પષ્ટ પ્રક્રિયા છે.

ટેરિફ યથાવત રહેશે, ચૂકાદાને સુપ્રીમમાં ‘અમેરિકાની’ જીતનો ટ્રમ્પને વિશ્ર્વાસ

અમેરિકાના રાષ્ટ્રપતિ ડોનાલ્ડ ટ્રમ્પે આજે કોર્ટના તે નિર્ણય પર પલટવાર કર્યો, જેમાં તેમની મોટા ભાગની ટેરિફ નીતિને ગેરકાયદેસર ઠેરવવામાં આવી છે. ટ્રમ્પે કહ્યુ કે તેમની ટેરિફ પોલિસી યથાવત છે અને તે આ મામલાને સુપ્રીમ કોર્ટમાં પડકારશે. ટ્રમ્સે સોશિયલ મીડિયા પર લખ્યું, બધા ટેરિફ હજુ પણ લાગૂ છે! એક પક્ષપાતી અદાલતે ખોટી રીતે કહ્યું કે અમારા ટેરિફ હટાવવા જોઈએ, પરંતુ અંતે જીત અમેરિકાની થશે. તેમણે ચેતવણી આપી કે જો ટેરિફ હટાવવામાં આવશે તો આ દેશ માટે પૂર્ણ આપદા હશે, જેનાથી અમેરિકા આર્થિક રીતે નબળું પડી જશે. ટ્રમ્પે કહ્યુ કે અમેરિતા હવે વિશાળ વેપાર ખોટ અને અન્ય દેશોની અયોગ્ય નીતિઓ સહન કરશે નહીં. તેમણે કહ્યું, લેબર ડે વીકેન્ડ પર આપણે યાદ રાખવું જોઈએ કે ટેરિફ આપણા કારીગરો અને મેડ ઇન અમેરિકા ઉત્પાદન બનાવનારી કંપનીઓ માટે સૌથી મોટું હથિયાર છે. સુપ્રીમ કોર્ટની મદદથી અમે તેનો દેશના હિતમાં ઉપયોગ કરીશું અને અમેરિકાને ફરી મજબૂત બનાવીશું.