યુરોપના અનેક મોટા એરપોર્ટ પર સાયબર અટેક!! ફ્લાઇટ્સ રદ ,ચેક-ઈન સિસ્ટમ ઠપ થતાં મુસાફરો અટવાયા
આજે યુરોપના અનેક મોટા એરપોર્ટ પર સાયબર હુમલા થયો છે. જેના કારણે ઘણી ફ્લાઇટ્સ વિલંબ થતા મુસાફરો પરેશાન થયાં હતા. ટેકનિકલ સમસ્યાને કારણે યુરોપના મુખ્ય એરપોર્ટ પર કડક સુરક્ષા લાગુ કરવામાં આવી છે, જેમાં ઘણાં એરપોર્ટ મેન્યુઅલ પ્રક્રિયાઓનો ઉપયોગ કરીને ફ્લાઇટ્સનું સંચાલન કરવામાં આવી રહ્યુ છે.
લંડનના હીથ્રો, બેલ્જિયમના બ્રસેલ્સ એરપોર્ટ અને જર્મનીના બર્લિન એરપોર્ટ સહિત અનેક મુખ્ય યુરોપિયન એરપોર્ટ પર સાયબર હુમલા થયા હતા. આ હુમલાઓમાં ચેક-ઇન અને બોર્ડિંગ સિસ્ટમ માટે સેવા પ્રદાતા કોલિન્સ એરસ્પેસને લક્ષ્ય બનાવવામાં આવ્યું હતું.
આ સાયબર હુમલાના પરિણામે અનેક ફ્લાઇટ રદ કરવામાં આવી, ફ્લાઇટમાં વિલંબ થયો અને હજારો મુસાફરોને અસુવિધા થઈ. ઘણા યુરોપિયન એરપોર્ટે મુસાફરોને તેમની ફ્લાઇટની સ્થિતિ તપાસવાની સલાહ આપી છે. એરલાઇન્સે અસુવિધા માટે માફી માંગી છે.
બ્રસેલ્સ એરપોર્ટે એક નિવેદનમાં જણાવ્યું હતું કે આ હુમલાનો અર્થ એ છે કે ફક્ત મેન્યુઅલ ચેક-ઇન અને બોર્ડિંગ શક્ય છે. બર્લિનના બ્રાન્ડેનબર્ગ એરપોર્ટના અધિકારીઓએ અહેવાલ આપ્યો છે કે પેસેન્જર હેન્ડલિંગ સિસ્ટમ માટે સેવા પ્રદાતા પર પણ હુમલો કરવામાં આવ્યો હતો, જેના કારણે એરપોર્ટ ઓપરેટરોને સિસ્ટમ ડિસ્કનેક્ટ કરવાની ફરજ પડી હતી.
યુરોપના સૌથી વ્યસ્ત એરપોર્ટ, હીથ્રોએ તેને ટેકનિકલ સમસ્યા ગણાવી હતી. એરપોર્ટે કહ્યું હતું કે તેનાથી ચેક-ઇન અને બોર્ડિંગ સેવાઓ પ્રભાવિત થઈ છે. હીથ્રોએ એક નિવેદન જારી કરીને કહ્યું હતું કે વિશ્વભરના ઘણા એરપોર્ટ પર ચેક-ઇન અને બોર્ડિંગ સિસ્ટમ સેવાઓ પૂરી પાડતી કંપની ટેકનિકલ સમસ્યાનો અનુભવ કરી રહી છે. આનાથી મુસાફરોને પ્રસ્થાન કરવામાં વિલંબ થઈ શકે છે. દરમિયાન, ફ્રાન્સે જણાવ્યું હતું કે સાયબર હુમલાની અસર ફક્ત થોડા એરપોર્ટ પર જ અનુભવાઈ હતી. પેરિસના રોઈસી, ઓર્લી અને લે બોર્ગેટ એરપોર્ટ પર કોઈ સમસ્યા નહોતી.
ઉલ્લેખનીય છે કે, આ બધા એરપોર્ટે મુસાફરોને નિયમિતપણે તેમની ફ્લાઇટ સ્ટેટસ ઓનલાઈન તપાસવા અને ફ્લાઇટના સમયને ધ્યાનમાં રાખીને તે મુજબ આયોજન કરવા વિનંતી કરી છે. એરપોર્ટ મેનેજમેન્ટે થયેલી અસુવિધા બદલ માફી માંગી છે અને શક્ય તેટલી વહેલી તકે સમસ્યાનો ઉકેલ લાવવા માટે સતત કાર્ય કરવાની ખાતરી આપી છે.
