Amazon-Flipkart સાથે સેમસંગ અને શાઓમીની મિલીભગત, ગ્રાહકોને આ રીતે છેતરી રહ્યા છે

કોમ્પિટિશન કમિશન ઓફ ઈન્ડિયા (CCI)એ પોતાના રિપોર્ટમાં Samsung, Xiaomi, Amazon અને Flipkart વચ્ચે મિલીભગતનો ગંભીર આરોપ લગાવ્યો છે. CCIએ પોતાના રિપોર્ટમાં કહ્યું છે કે આ કંપનીઓના ગુપ્ત કરારોને કારણે ગ્રાહકોને મુશ્કેલીનો સામનો કરવો પડી રહ્યો છે. ઓનલાઈન રિટેલ પ્લેટફોર્મ એમેઝોન અને ફ્લિપકાર્ટ સીસીઆઈના કોમ્પિટિશન કાયદા વિરુદ્ધ કામ કરી રહ્યા છે. આ ઈ-કોમર્સ પ્લેટફોર્મ અમુક કંપનીઓને જ પ્રોત્સાહન આપે છે.

રોઇટર્સના અહેવાલ મુજબ, ભારતના સ્પર્ધાત્મક પંચે કહ્યું છે કે અમારી તપાસમાં સામે આવ્યું છે કે સેમસંગ અને શાઓમી જેવી ઘણી કંપનીઓએ એમેઝોન અને વોલમાર્ટની માલિકીની ફ્લિપકાર્ટ સાથે ગુપ્ત કરાર કર્યા છે. એમેઝોન અને ફ્લિપકાર્ટ આ કંપનીઓના ઉત્પાદનો વિશિષ્ટ રીતે લોન્ચ કરે છે. તેઓ આવી કંપનીઓને જ પ્રાથમિકતા આપે છે. અન્ય કંપનીઓને તેમના લિસ્ટિંગ અને ડિસ્કાઉન્ટ દ્વારા નુકસાન થઈ રહ્યું છે.

CCIએ તેના 1,027 પેજના રિપોર્ટમાં જણાવ્યું છે કે Amazon એ Samsung, Xiaomi, Realme, Motorola અને OnePlusના એક્સક્લુઝિવ ફોન લોન્ચ કર્યા છે. તેઓએ સ્પર્ધાના કાયદાનું ઉલ્લંઘન કર્યું છે. બીજી તરફ, ફ્લિપકાર્ટ વિશેના 1,696 પાનાના અહેવાલમાં એવું કહેવામાં આવ્યું છે કે તેણે સેમસંગ, શાઓમી, મોટોરોલા, વિવો, લેનોવો અને રિયલમી સાથે સમાન કરાર કરીને કાયદાની વિરુદ્ધ કામ કર્યું છે. સેમસંગ અને શાઓમી સામેના આ આરોપો ગંભીર છે અને તેમની મુશ્કેલીઓ વધારી શકે છે.

એમેઝોન અને ફ્લિપકાર્ટના રિપોર્ટમાં CCIના એડિશનલ ડાયરેક્ટર જનરલ જીવી શિવ પ્રસાદે લખ્યું છે કે એક્સક્લુઝિવ કોન્ટ્રાક્ટ બિઝનેસમાં અભિશાપ સમાન છે. આ સંપૂર્ણપણે ગ્રાહકના હિતની વિરુદ્ધ છે. આનાથી માત્ર ઉપભોક્તાને જ નુકસાન થતું નથી પરંતુ બજારમાં મુક્ત અને ન્યાયી સ્પર્ધાને પણ અટકાવે છે.