ટાઇમની ટોપ 100 પરોપકારીઓની યાદીમાં અંબાણી દંપતી

અઝીમ પ્રેમજી, નિખિલ કામથ સહિતના ભારતીયોનો સમાવેશ

ગુજરાત મિરર,નવી દિલ્હી તા.21 અમેરિકાના અગ્રણી ટાઈમ મેગેઝિને પહેલી વાર TIME 100 પરોપકાર 2025 ની યાદી બહાર પાડી છે. TIME એ તેને વિશ્વના ટોચના 100 પરોપકારી કાર્યોમાં સામેલ કર્યું છે. ટાઈમ દ્વારા જાહેર કરાયેલી આ પહેલી યાદીમાં ભારતના સૌથી ધનિક વ્યક્તિ અને રિલાયન્સ ઇન્ડસ્ટ્રીઝના ચેરમેન મુકેશ અંબાણી તેમજ રિલાયન્સ ફાઉન્ડેશનના સ્થાપક અને મુકેશ અંબાણીના પત્ની નીતા અંબાણીને પણ સ્થાન આપવામાં આવ્યું છે. મુકેશ અંબાણી અને નીતા અંબાણી ઉપરાંત, વિશ્વના અગ્રણી દાનવીરોની યાદીમાં ઘણા અન્ય ભારતીયોના નામ સામેલ છે.

ટાઈમે આ યાદીમાં સમાવિષ્ટ 100 લોકોને 4 અલગ અલગ શ્રેણીઓમાં વિભાજિત કર્યા છે ટાઇટન્સ, લીડર્સ, ટ્રેલબ્લેઝર્સ અને ઇનોવેટર્સ. મુકેશ અંબાણી અને નીતા અંબાણીને ટાઇટન્સ શ્રેણી હેઠળ આ યાદીમાં સામેલ કરવામાં આવ્યા છે.

ટાઈમે કહ્યું છે કે મુકેશ અંબાણી અને નીતા અંબાણી કરોડો લોકોને સશક્ત બનાવવા માટે અદ્ભુત કાર્ય કરી રહ્યા છે. આ શ્રેણીમાં ભારતીય આઈટી કંપની વિપ્રોના ચેરમેન અઝીમ પ્રેમજીનું નામ પણ સામેલ છે, જેઓ ભારતમાં શિક્ષણ સુધારવા માટે કામ કરી રહ્યા છે.

ભારતના જાણીતા યુવા ઉદ્યોગસાહસિક અને રોકાણકાર નિખિલ કામથનો TIME 100 ફિલાન્થ્રોપી 2025 ની ટ્રેલબ્લેઝર્સ શ્રેણીમાં સમાવેશ કરવામાં આવ્યો છે. નિખિલ કામથ દેશના સારા ભવિષ્ય માટે મોટી રકમનું દાન કરી રહ્યા છે અને અન્ય યુવાનોને પણ દાન કરવા માટે પ્રેરણા આપી રહ્યા છે.

આ યાદીમાં ભારતીય મૂળના અમેરિકન પત્રકાર અને લેખક આનંદ ગિરિધરદાસનું નામ ઇનોવેટર્સ શ્રેણીમાં સામેલ કરવામાં આવ્યું છે. ટાઈમે તેની યાદીમાં દિગ્ગજ રોકાણકાર વોરેન બફેટ, ઇંગ્લેન્ડના ભૂતપૂર્વ ફૂટબોલ ખેલાડી ડેવિડ બેકહામ અને માઇક્રોસોફ્ટના સહ-સ્થાપક બિલ ગેટ્સની ભૂતપૂર્વ પત્ની મેલિન્ડા ફ્રેન્ચ ગેટ્સ જેવા દિગ્ગજોના નામનો સમાવેશ કર્યો છે.