ટેરીફ વિવાદ વચ્ચે ભારત-USના સંબંધોનો નવો અધ્યાય, 10 વર્ષનો કર્યો ઐતિહાસિક સંરક્ષણ કરાર
ભારત અને અમેરિકા વચ્ચે 10 વર્ષનો સંરક્ષણ કરાર થયો છે. મલેશિયાની રાજધાની કુઆલાલંપુરમાં સંરક્ષણ પ્રધાન રાજનાથ સિંહ સાથે મુલાકાત બાદ યુએસ સંરક્ષણ સચિવ પીટ હેગસેથે આ જાહેરાત કરી હતી. કરાર મુજબ, બંને દેશો એકબીજા સાથે માહિતી શેર કરશે. આ કરારમાં એકબીજાને તકનીકી સહાય પૂરી પાડવાનો પણ સમાવેશ થાય છે.
સંરક્ષણ કરાર પર બોલતા પીટ હેગસેથે કહ્યું, "આ પ્રકારનો કરાર પહેલાં ક્યારેય થયો નથી. અમે 10 વર્ષ માટે સંરક્ષણ કરાર પર હસ્તાક્ષર કર્યા છે. આ નિર્ણય બંને દેશો વચ્ચે સંકલન બનાવવાનો પ્રયાસ છે. સંરક્ષણ કરારનો મુખ્ય ઉદ્દેશ્ય પ્રાદેશિક સ્થિરતા જાળવવા, લશ્કરી સંકલનને વધુ ગાઢ બનાવવા અને સંરક્ષણ ટેકનોલોજી સહયોગ વધારવાનો છે."
કુઆલાલમ્પુર ખાતે અમેરિકી સંરક્ષણ મંત્રી સાથેની મુલાકાત દરમિયાન, રાજનાથ સિંહે જણાવ્યું કે આ 10 વર્ષના મહત્ત્વપૂર્ણ સંરક્ષણ કરારથી ભારત-અમેરિકાના સંબંધોમાં નવો અધ્યાય શરૂ થયો છે. તેમણે આનંદ વ્યક્ત કર્યો કે ફોન પર ત્રણ વખત વાતચીત કર્યા પછી, આજે ADMM-Plus બેઠક દરમિયાન રૂબરૂ મુલાકાત થઈ રહી છે. રાજનાથ સિંહે વિશ્વાસ વ્યક્ત કર્યો કે આ સંરક્ષણ કરાર પર હસ્તાક્ષર થવાથી શરૂ થયેલો આ નવો અધ્યાય, અમેરિકી સંરક્ષણ મંત્રીના નેતૃત્વમાં ભારત-અમેરિકા સંબંધોને વધુ મજબૂત બનાવશે.
શુક્રવારે, આ મુલાકાત કુઆલાલમ્પુર (મલેશિયા) ખાતે આસિયાન-ભારત સંરક્ષણ મંત્રીઓની બીજી અનૌપચારિક બેઠક દરમિયાન થઈ હતી. આ બેઠક આસિયાન ડિફેન્સ મિનિસ્ટર્સ મીટિંગ-પ્લસ (ADMM-Plus) ના કાર્યક્રમનો એક ભાગ હતી, જે 1લી નવેમ્બરે યોજાવાનો છે. સંરક્ષણ મંત્રી રાજનાથ સિંહે અગાઉ જ જાહેરાત કરી દીધી હતી કે તેઓ આસિયાનની આ બેઠકોમાં ભાગ લેશે.
અગાઉ એસ. જયશંકર અને માર્કો રુબિયોની મુલાકાત
રાજનાથ સિંહના મતે, આસિયાન બેઠકનો હેતુ ભારત અને આસિયાન દેશો વચ્ચે સંરક્ષણ અને સુરક્ષા સહયોગને મજબૂત બનાવવાનો અને 'એક્ટ ઈસ્ટ પોલિસી'ને આગળ વધારવાનો હતો.
રાજનાથ સિંહ અને અમેરિકી સંરક્ષણ મંત્રી પીટ હેગસેથ વચ્ચેની આ મુલાકાત એવા સમયે થઈ જ્યારે થોડા દિવસો પહેલા જ વિદેશ મંત્રી એસ. જયશંકરે પણ કુઆલાલમ્પુર ખાતે ઈસ્ટ એશિયા સમિટ દરમિયાન અમેરિકાના વિદેશ મંત્રી માર્કો રુબિયો સાથે મુલાકાત કરી હતી. જયશંકર અને રુબિયોએ ભારત-અમેરિકા સંબંધો તેમજ પ્રાદેશિક અને વૈશ્વિક મુદ્દાઓ પર ચર્ચા કરી હતી.
આ કરારની શું અસર થશે?
યુનાઇટેડ સ્ટેટ્સ અને ભારત વચ્ચેના સંરક્ષણ કરારની સીધી અસર ઇન્ડો-પેસિફિક પર પડી શકે છે. આ કરાર ઇન્ડો-પેસિફિકમાં ઊંડા લશ્કરી સહયોગ, ક્ષમતા નિર્માણ અને સંયુક્ત પહેલ માટે દાયકા લાંબી રોડમેપ પ્રદાન કરે છે.