ઈરાન-ઈઝરાયલ યુધ્ધમાં 400નાં મોત, આયાતુલ્લા બંકરમાં છુપાયા

ઈઝરાયલનો ઈરાનના ફોર્ડો પરમાણુ સુવિધા નજીક હુમલાથી ભૂકંપ જેવી સ્થિતિ: અસંખ્ય લોકો ઘાયલ

મધ્ય પૂર્વમાં ઈરાન અને ઈઝરાયલ વચ્ચે ભયંકર યુદ્ધ શરૂૂ થયું છે. ઈઝરાયલ સતત ઈરાનના પરમાણુ અને મિસાઈલ ઠેકાણાઓને નિશાન બનાવી રહ્યું છે. આજે ઈઝરાયલ દ્વારા કરવામાં આવેલા હુમલાઓ પછી, દેશમાં મોટા વિસ્ફોટો થયા છે, જેના કારણે ભૂકંપ જેવી સ્થિતિ સર્જાઈ છે. ઈરાનના ફોર્ડો પરમાણુ સુવિધા નજીક આવેલા ભૂકંપની તીવ્રતા રિક્ટર સ્કેલ પર 2.5 માપવામાં આવી છે. ઈરાને પણ ઈઝરાયલ પર અનેક હુમલા કર્યા છે. દરમિયાન, સમાચાર આવ્યા છે કે ઈરાનના સર્વોચ્ચ નેતા આયાતુલ્લા અલી ખામેનીએ બચવા માટે બંકરમાં આશરો લીધો છે.

ઈરાન ઈન્ટરનેશનલના અહેવાલ મુજબ, ઈરાનના સર્વોચ્ચ નેતા આયાતુલ્લા અલી ખામેનીને તેમની સલામતી માટે તેહરાનમાં ભૂગર્ભ બંકરમાં મોકલવામાં આવ્યા છે. સૂત્રોના હવાલાથી, અહેવાલમાં એમ પણ કહેવામાં આવ્યું છે કે આ સમય દરમિયાન ખામેનીનો આખો પરિવાર પણ તેમની સાથે છે.તે જ સમયે, ખામેનીના પુત્ર મોજતબા, જેને તેમના ઉત્તરાધિકારી માનવામાં આવે છે, તે પણ ઈરાની નેતા સાથે હાજર છે.

અગાઉ, ઈરાને સોમવારે કહ્યું હતું કે ગયા શુક્રવારે ઈઝરાયલ દ્વારા કરવામાં આવેલા તાજેતરના હુમલાઓમાં અત્યાર સુધીમાં 224 ઈરાનીઓ માર્યા ગયા છે. તેમાં ઈરાનના લશ્કરી વડા અને અનેક પરમાણુ અધિકારીઓનો સમાવેશ થાય છે. એક હજારથી વધુ લોકો ઘાયલ થયા છે. બીજી તરફ, ઇઝરાયલે કહ્યું છે કે ઈરાન દ્વારા કરવામાં આવેલા હુમલામાં 14 લોકો માર્યા ગયા છે. 300 થી વધુ લોકો ઘાયલ થયા છે. નોંધનીય છે કે ઇઝરાયલે શુક્રવારે સવારે ઓપરેશન રાઇઝિંગ લાયન શરૂૂ કર્યું હતું, જેમાં ઇરાનના પરમાણુ કાર્યક્રમને નિશાન બનાવવામાં આવ્યો હતો. આ દરમિયાન ઇઝરાયલે ઇરાનના ઘણા પરમાણુ, મિસાઇલ અને લશ્કરી માળખાને નિશાન બનાવ્યા હતા. ઇરાને ઇઝરાયલ પર અનેક બદલો લેવાના હુમલા પણ કર્યા છે. વોશિંગ્ટન સ્થિત હ્યુમન રાઈટસના એક્ટિવિસ્ટસના જણાવ્યા મુજબ ઈરાનમાં 406 લોકો માર્યા ગયા છે અને 654 ઘાયલ થયા હતાં.

આ દરમિયાન, એવા અહેવાલો પણ બહાર આવ્યા છે કે ઇરાને યુદ્ધવિરામ પર વાત કરવાનો સ્પષ્ટ ઇનકાર કર્યો છે. એક અહેવાલ મુજબ, ઇરાને મધ્યસ્થી દેશો કતાર અને ઓમાન દ્વારા સ્પષ્ટ સંદેશ આપ્યો છે કે તે ઇઝરાયલના હુમલાઓનો જવાબ આપ્યા પછી જ યુદ્ધવિરામ પર વિચાર કરશે. ઇરાને સ્પષ્ટપણે કહ્યું છે કે ઇઝરાયલી હુમલાઓ વચ્ચે ઇરાન સમાધાન કરશે નહીં.

ઈરાનના સુપ્રીમ નેતાની હત્યાની નેતન્યાહુની યોજના ટ્રમ્પે અટકાવી
ઈઝરાયેલ અને ઈરાન વચ્ચે ચાલી રહેલા અત્યંત તણાવપૂર્ણ સંઘર્ષમાં એક એવા રિપોર્ટે ખળભળાટ મચાવ્યો છે, જેણે મધ્ય પૂર્વમાં એક મોટા યુદ્ધને ટાળવામાં અમેરિકાની ભૂમિકા પર પ્રકાશ પાડ્યો છે. અમેરિકાની પ્રતિષ્ઠિત ન્યૂઝ એજન્સીએ રોઇટર્સે બે વરિષ્ઠ અમેરિકી અધિકારીઓને ટાંકીને દાવો કર્યો છે કે ઈઝરાયેલના વડાપ્રધાન બેન્જામિન નેતન્યાહૂએ માત્ર બે દિવસ પહેલાં જ ઈરાનના સર્વોચ્ચ નેતા આયાતુલ્લાહ અલી ખામેનીની હત્યા કરવાની યોજનાને લગભગ મંજૂરી આપી દીધી હતી. જોકે, અમેરિકાના પૂર્વ રાષ્ટ્રપતિ ડોનાલ્ડ ટ્રમ્પના હસ્તક્ષેપને કારણે આ અત્યંત જોખમી યોજનાને છેલ્લી ઘડીએ અટકાવી દેવામાં આવી હતી.

ભારત-પાક.ની જેમ હું ઈઝરાયલ, ઈરાન યુધ્ધનો અંત લાવીશ : ટ્રમ્પ
ઇઝરાયલ અને ઇરાન વચ્ચે ચાલી રહેલા યુદ્ધને કારણે મધ્ય પૂર્વમાં તણાવ ચરમસીમા પર છે. ઇરાને ઓમાનની રાજધાની મસ્કતમાં યુએસ સાથેની પરમાણુ વાટાઘાટો પણ આ યુદ્ધના કારણે રદ કરી છે અને આ યુદ્ધ માટે સીધા અમેરિકાને દોષી ઠેરવી રહ્યું છે. આ ગંભીર પરિસ્થિતિ વચ્ચે, રવિવારે યુએસના પૂર્વ પ્રમુખ ડોનાલ્ડ ટ્રમ્પ નું એક મોટું નિવેદન સામે આવ્યું છે, જેમાં તેમણે આ યુદ્ધનો અંત લાવવાનો દાવો કર્યો છે. ડોનાલ્ડ ટ્રમ્પે દાવો કર્યો હતો કે ઇરાન અને ઇઝરાયલે એક કરાર કરવો જોઈએ અને તેઓ એક કરાર કરશે. તેમણે ભારપૂર્વક જણાવ્યું કે, જેમ મેં ભારત અને પાકિસ્તાન સાથે કર્યું હતું. ટ્રમ્પે સૂચવ્યું કે યુનાઇટેડ સ્ટેટ્સ સાથે વેપારનો ઉપયોગ કરીને અને ઝડપથી નિર્ણયો લેવા અને રોકવામાં સક્ષમ બે મહાન નેતાઓ સાથે વાતચીત કરીને તર્ક, સંવાદિતા અને સમજદારી લાવી શકાય છે.

મને, ટ્રમ્પને મારવાનું ઈરાની કાવતરું : નેતન્યાહુ
ઈરાન સાથે ચાલી રહેલા સંઘર્ષ વચ્ચે, ઇઝરાયલી વડા પ્રધાન બેન્જામિન નેતન્યાહૂએ એક મોટો દાવો કર્યો. તેમણે કહ્યું છે કે યુએસ રાષ્ટ્રપતિ ડોનાલ્ડ ટ્રમ્પ ઈરાનના નંબર વન દુશ્મન છે. એટલું જ નહીં, તેમનો દાવો છે કે ઈરાન ટ્રમ્પને મારવાનું કામ કરી રહ્યું છે. શુક્રવારથી ઈરાન અને ઇઝરાયલ વચ્ચે લોહિયાળ સંઘર્ષ ચાલી રહ્યો છે. ઇઝરાયલી પીએમ એવો પણ દાવો કરે છે કે તેઓ પણ ઇરાનના નિશાના પર છે. તેમણે ઇરાનના પરમાણુ શસ્ત્રો સામેના યુદ્ધમાં પોતાને ટ્રમ્પના ‘જુનિયર પાર્ટનર’ તરીકે વર્ણવ્યા છે.