ચૂંટણી ટાણે પાકિસ્તાનના બલૂચિસ્તાનમાં એકસાથે 2 બ્લાસ્ટ, 28નાં મોત

પાકિસ્તાનની ચૂંટણીના એક દિવસ પહેલા બલૂચિસ્તાનમાં બે બ્લાસ્ટ ઘટના બની. પહેલો વિસ્ફોટ પિશિન શહેરમાં થયો હતો. જેમાં 15 લોકોના મોત થયા હતા અને 30 લોકો ઘાયલ થયા હતા. પાકિસ્તાની મીડિયા જિયો ન્યૂઝ અનુસાર, વિસ્ફોટ અપક્ષ ઉમેદવાર અસફંદ યાર ખાન કાકરની ઓફિસની બહાર થયો હતો. બ્લાસ્ટ વખતે કક્કડ ઓફિસમાં હાજર ન હતા. તે જ સમયે, બીજો વિસ્ફોટ બલૂચિસ્તાનના કિલા સૈફુલ્લાહ શહેરમાં જમિયત-ઉલેમા-એ-ઇસ્લામ (JUI-F) પાર્ટીના ઉમેદવાર મૌલાના અબ્દુલ વાસેના કાર્યાલયની બહાર થયો હતો. તેઓ સુરક્ષિત છે. જોકે, આ હુમલામાં 13 લોકોના મોત થયા છે, જ્યારે 10 લોકો ઘાયલ થયા છે. બંને વિસ્ફોટોમાં કુલ 28 લોકોના મોત થયા છે.

પાકિસ્તાનમાં 8 ફેબ્રુઆરીએ સામાન્ય ચૂંટણી છે. પાકિસ્તાનના ચૂંટણી પંચે બલૂચિસ્તાનના મુખ્ય સચિવ અને પોલીસ પાસેથી હુમલા અંગે રિપોર્ટ માંગ્યો છે.

બલૂચિસ્તાનના કેરટેકર ઈન્ફોર્મેશન મિનિસ્ટર જાન અચકઝાઈએ કહ્યું- પહેલા બ્લાસ્ટની પ્રાથમિક તપાસમાં સામે આવ્યું છે કે વિસ્ફોટક સામગ્રી બાઇકમાં રાખવામાં આવી હતી. આ મામલે તપાસ કરવામાં આવી રહી છે. જો કે, બીજા બ્લાસ્ટનું કારણ બહાર આવ્યું નથી.

અહીં બલૂચિસ્તાનના મુખ્યમંત્રી અલી મર્દાન ખાન ડોમકીએ હુમલાની નિંદા કરી છે. તેમણે કહ્યું- આવી ઘટનાઓ શાંતિપૂર્ણ ચૂંટણી પ્રક્રિયાને નબળી પાડવાનું ષડયંત્ર છે. હુમલામાં સામેલ લોકોને આકરી સજા આપવામાં આવશે. અમે ઘાયલોની મદદ માટે તમામ શક્ય પ્રયાસો કરી રહ્યા છીએ.

8 ફેબ્રુઆરીએ યોજાનારી નેશનલ અને એસેમ્બલીની ચૂંટણી પહેલા પાકિસ્તાનમાં હિંસાની ઘટનાઓમાં વધારો થયો છે. જિયો ન્યૂઝના અહેવાલ મુજબ, બલૂચિસ્તાન અને ખૈબર પખ્તુનખ્વામાં તાજેતરના સમયમાં આતંકવાદી હુમલાઓ તેજ થયા છે. બલૂચ લિબરેશન આર્મી બલૂચિસ્તાનમાં અને પાકિસ્તાની તાલિબાન ખૈબરમાં હુમલાઓ કરી રહી છે.આ અહેવાલમાં કહેવામાં આવ્યું છે કે થોડા દિવસો પહેલા સેનેટમાં 8 ફેબ્રુઆરીએ યોજાનારી ચૂંટણીને મોકૂફ રાખવાની માંગ કરવામાં આવી હતી. તાજેતરના સમયમાં આતંકવાદ અને હિંસાની વધી રહેલી ઘટનાઓ કોઈ ષડયંત્ર તરફ ઈશારો કરી રહી છે.