ગઠબંધનમાં મમતા-કેજરીવાલ વિરૂદ્ધ લાલુ-નીતિશ

વિપક્ષી ગઠબંધન INDIAની ચોથી બેઠક દિલ્હીની અશોકા હોટલમાં મળી હતી. આ બેઠકમાં વિરોધ પક્ષો વચ્ચે ઘણા મુદ્દાઓ પર ચર્ચા કરવામાં આવી હતી પરંતુ જેવો મમતા બેનરજીએ પીએમ તરીકે કોંગ્રેસ અધ્યક્ષના નામનો પ્રસ્તાવ મૂક્યો કે તરત મોટો ડખો સામે આવ્યો હતો અને બે મોટા નેતાને આ પ્રસ્તાવ જરા વહેલો મૂકાયો હોવાનું લાગ્યું હતું અને તેઓ ભારે નારાજ થયા હતા અને તેઓ અધવચ્ચે ઉઠીને ચાલતી પકડી હતી.
ભારત ગઠબંધનની બેઠકમાં મમતા બેનર્જીએ વડાપ્રધાન પદના ઉમેદવાર માટે મલ્લિકાર્જુન ખડગેનું નામ લેતા જ લાલુ પ્રસાદ અને નીતિશ કુમારને આ વાતે ગુસ્સો આવી ગયો હતો. મલ્લિકાર્જુન ખડગેના નામનો પ્રસ્તાવ મુકવાથી નારાજ લાલુ અને નીતિશ ગઠબંધનની બેઠક વહેલા છોડીને ચાલ્યા ગયા હતા અને પ્રેસ કોન્ફરન્સમાં પણ સામેલ થયા નહોતા. ઉલ્લેખનીય છે કે, લાલુએ થોડા દિવસ પહેલા નીતિશ કુમારના સમર્થનમાં નિવેદન આપ્યું હતું અને કહ્યું હતું કે, નીતિશ કુમાર સામે કોઇ પડકાર નથી.
બેઠકમાં નીતિશ કુમારે શક્ય તેટલી વહેલી તકે બેઠકોની વહેંચણી પર ધ્યાન કેન્દ્રિત કરવાની વાત કરી હતી. આ બેઠકમાં મમતા બેનર્જીએ કહ્યું હતું કે ખડગેને પીએમ પદના ઉમેદવાર બનાવવા માટે તેમણે અરવિંદ કેજરીવાલ, ઉદ્ધવ અને અન્ય લોકો સાથે ચર્ચા કરી છે. અરવિંદ કેજરીવાલે દલિત પાસા પર દલીલ કરતી વખતે મમતા બેનર્જીના પ્રસ્તાવને જોરદાર ટેકો આપ્યો હતો.
બેઠક બાદ પ્રેસ કોન્ફરન્સમાં કોંગ્રેસ અધ્યક્ષ મલ્લિકાર્જુન ખડગેએ કહ્યું કે, પહેલી પ્રાથમિકતા જીતની છે અને જીત બાદ પીએમનું નામ નક્કી થઈ શકે. ભારતીય ગઠબંધનો વચ્ચે સીટોની વહેંચણી રાજ્ય સ્તર પર થશે. જો આ ફોર્મ્યુલા કામ નહીં કરે તો આપણે સૌ સાથે મળીને આ બાબતે નિર્ણય કરીશું. જાણકારી અનુસાર ટીએમસી એટલા માટે ખુશ નહોતી કારણ કે બંગાળમાં સીટોની વહેંચણી પર કોંગ્રેસે હજુ સુધી પોતાની સ્થિતિ સ્પષ્ટ કરી નથી. આ પછી ટીએમસી સહિત ભારત ગઠબંધનની ઘણી પાર્ટીઓએ સીટોની વહેંચણીને અંતિમ રૂૂપ આપવા માટે 31 ડિસેમ્બર સુધીની ડેડલાઈન નક્કી કરી છે.
આ બેઠકમાં ટીએમસીએ પ્રસ્તાવ મૂક્યો હતો કે કોંગ્રેસે લગભગ 300 બેઠકો પર ચૂંટણી લડવી જોઈએ, જ્યાં તેની સીધી ટક્કર ભાજપ સાથે છે. બાકીની બેઠકો પર કોંગ્રેસે પ્રાદેશિક પક્ષોને ટેકો આપવો જોઈએ. ટીએમસી, જેડીયુ સહિત અનેક પક્ષોએ 31 ડિસેમ્બર સુધીમાં બેઠકોની વહેંચણી પર મહોર લગાવવાનો પ્રસ્તાવ મૂક્યો હતો.

ઈવીએમ સાથે વીવીપીટીની 100 ટકા ગણતરી કરો: બેઠકમાં ઠરાવ પસાર

વિપક્ષી ગઠબંધનની બેઠકમાં ઈવીએમ અને સાંસદોના સસ્પેન્શનની ચર્ચા થઈ હતી ઈવીએમના ઉપયોગ સામેે ઠરાવ પસાર કરાયો હતો ઠરાવમાં જણાવ્યું હતું કે, ઈવીએમના ઉપયોગ બાબતે સંદેહ છે આથી મતપત્ર પ્રણાલી ફરી અપનાવી જોઈએ વિકલ્પમાં વીવીપીટી મતોની 100% ગણતરી કરતા માંગણી કરવામાં આવી છે. બીજીબાજુ લોકસભાની ચુંટણી આડે માત્ર ચાર મહિના રહ્યા છે ત્યારે આરજેડી સાંસદ મનોજ ઝાએ ત્રણ સપ્તાહમાં બેઠક વહેંચણીનું કામ પુરુ કરવા સુચન કર્યુ હતું જે માન્ય રખાયું હતું.