જ્ઞાનવાપી કેસમાં ASI 18 ડિસેમ્બરે આપશે પોતાનો રિપોર્ટ , કોર્ટ પાસે વધુ એક સપ્તાહની માંગી મંજુરી

ભારતીય પુરાતત્વ સર્વેક્ષણ (ASI) એ સોમવારે જ્ઞાનવાપી મસ્જિદ સંકુલમાં હાથ ધરાયેલા સર્વેનો રિપોર્ટ ફાઈલ કર્યો ન હતો. રિપોર્ટ દાખલ કરવા માટે વધુ એક સમય આપવા જિલ્લા ન્યાયાધીશ ડૉ.અજય કૃષ્ણ વિશ્વેશની કોર્ટમાં અરજી દાખલ કરવામાં આવી છે.કોર્ટે ASIને 11મી ડિસેમ્બરે રિપોર્ટ દાખલ કરવા આદેશ કર્યો હતો.

ASI દ્વારા આપવામાં આવેલી અરજીમાં કહેવામાં આવ્યું હતું કે બ્લડ પ્રેશર અચાનક વધી જવાને કારણે ASI સુપરિન્ટેન્ડિંગ આર્કિયોલોજિસ્ટ અવિનાશ મોહંતીની તબિયત લથડી હતી. જેના કારણે તેઓ કોર્ટમાં હાજર રહીને સર્વે રિપોર્ટ દાખલ કરી શકતા નથી.

આવી સ્થિતિમાં, સર્વે રિપોર્ટ ફાઇલ કરવા માટે ઓછામાં ઓછા એક અઠવાડિયા પછીની તારીખ નક્કી કરવી યોગ્ય રહેશે. જેના પર જિલ્લા ન્યાયાધીશે 18મી ડિસેમ્બરની તારીખ નક્કી કરી છે.

જણાવી દઈએ કે, વજુ ખાનાના સીલ કરાયેલા વિસ્તાર સિવાય સમગ્ર જ્ઞાનવાપી સંકુલની વૈજ્ઞાનિક તપાસ (ASI સર્વે) માટેની અરજી મંદિર તરફથી 16 મેના રોજ જિલ્લા ન્યાયાધીશની કોર્ટમાં દાખલ કરવામાં આવી હતી. આને સ્વીકારીને, 21 જુલાઈના રોજ, જિલ્લા અદાલતે જ્ઞાનવાપી સંકુલ (સુપ્રીમ કોર્ટ દ્વારા સીલ કરાયેલ વિસ્તાર સિવાય)ના સર્વેક્ષણનો આદેશ આપ્યો હતો.

તેની સામે પ્રતિવાદી અંજુમન ઈન્તેજામિયા મસ્જિદ (મસ્જિદ પક્ષ) 24 જુલાઈએ સુપ્રીમ કોર્ટમાં ગઈ હતી. સુપ્રીમ કોર્ટે તેમને હાઈકોર્ટમાં જઈને 26 જુલાઈ સુધી સર્વે પર સ્ટે મૂકવાનો આદેશ આપ્યો હતો. 25 જુલાઈના રોજ હાઈકોર્ટે આ કેસની સુનાવણી માટે 3 ઓગસ્ટ સુધી સર્વે પર સ્ટે આપ્યો હતો.

3 ઓગસ્ટના રોજ હાઈકોર્ટે ASIને જ્ઞાનવાપી સંકુલમાં સર્વે કરવાની પરવાનગી આપી હતી. 4 ઓગસ્ટથી જ્ઞાનવાપી કેમ્પસમાં ફરી સર્વે શરૂ કરવામાં આવ્યો હતો અને 2 નવેમ્બર સુધી ચાલુ રહ્યો હતો.