હિટ એન્ડ રન: પાંચ વર્ષના માસૂમને અજાણ્યા કારચાલકે ઉલાળતા મોત

માંગરોળ તાલુકાના સેપા ગામે ખેત મજુરી અર્થે આવેલા શ્રમિક પરિવારનો પાંચ વર્ષના માસુમ વાડી પાસે રોડ કાંઠે રમતો હતો ત્યારે અજાણ્યા કાર ચાલકે ઠોકરે ચડાવતાં અકસ્માત સર્જાયો હતો. હિટ એન્ડ રનની ઘટનામાં ગંભીર રીતે ઘવાયેલા માસુમ બાળકનું સારવારમાં મોત નિપજતાં પરિવારમાં અરેરાટી સાથે ગમગીની છવાઈ જવા પામી છે.

આ બનાવ અંગે પોલીસમાંથી જાણવા મળતી વિગત મુજબ, મુળ મધ્યપ્રદેશના વતની અને છેલ્લા ત્રણેય વર્ષથી માંગરોળના સેપા ગામે ખેત મજુરી કરતાં શ્રમિક પરિવારનો સાવન દેરામભાઈ બરડે નામનો પાંચ વર્ષના માસુમ બે દિવસ પૂર્વે સેપા ગામે મનીષભાઈની વાડી પાસે રોડ કાંઠે રમતો હતો ત્યારે માતેલા સાંઢની માફક ધસી આવેલી અજાણી કારના ચાલકે માસુમ બાળકને ઠોકરે ચડાવતાં અકસ્માત સર્જાયો હતો. અકસ્માત સર્જી કાર ચાલક નાસી છુટયો હતો. અકસ્માતમાં ગંભીર રીતે ઘવાયેલા માસુમને તાત્કાલીક સારવાર માટે માંગરોળ અને જૂનાગઢ બાદ વધુ સારવાર માટે રાજકોટ સિવિલ હોસ્પિટલમાં ખસેડવામાં આવ્યો હતો. જ્યાં ટૂંકી સારવાર દરમિયાન માસુમ બાળકે હોસ્પિટલના બીછાને દમ તોડી દેતાં શ્રમિક પરિવારમાં ગમનગીની છવાઈ જવા પામી છે.

પ્રાથમિક પુછપરછમાં મૃતક બાળક બે ભાઈ ત્રણ બહેનમાં નાનો હતો અને વાડી પાસે રોડના કાંઠે રમતો હતો ત્યારે કાર ચાલકે ઠોકરે ચડાવતાં જીવલેણ અકસ્માત સર્જાયો હોવાનું જાણવા મળ્યું છે. આ બનાવ અંગે પોલીસે નોંધ કરી વધુ તપાસ હાથ ધરી છે.