અમદાવાદ એરપોર્ટ પરથી 19.72 કરોડના ગાંજા સાથે મહિલા ઝડપાઈ

બેંગકોકથી આવતી હતી, છેલ્લા પખવાડીયામાં 110 કરોડનો હાઈડ્રોપોનિકસ ગાંજો પકડાયો

દાણચોરી માટે ફેવરિટ અમદાવાદ એરપોર્ટ હવે હાઇબ્રિડ ગાંજાનું દેશનું પ્રવેશ દ્વાર બની ગયું હોય તેવો ઘાટ થયો છે. બેંગકોકથી આવી રહેલી મુસાફર પાસેથી ફરી એર ઇન્ટેલિજન્સ યુનિટે રૂૂ. 19.72 કરોડનો 19.728 કિલો હાઇડ્રોપોનિક્સ ગાંજો ઝડપી લીધો હતો. આ મુસાફર ગાંજો કોના માટે લાવી રહ્યો હતો તેની તપાસ ચાલી રહી છે. અત્રે ઉલ્લેખનીય છે કે અમદાવાદ એરપોર્ટ પરથી છેલ્લા પખવાડિયામાં 110 કરોડનો હાઇડ્રોપોનિક્સ ગાંજો ઝડપાયો છે, જે ચિંતાજનક બાબત છે.

અમદાવાદ ઇન્ટરનેશનલ એરપોર્ટ પર એર ઇન્ટેલિજન્સ યુનિટના અધિકારીઓને બાતમી મળી હતી કે બેંગકોકથી આવી રહેલી એક ફ્લાઇટમાં એક મહિલા મુસાફર ગાંજાનો જથ્થો લઇને આવે છે. તેને પગલે અધિકારીઓ એલર્ટ બની ગયા હતા. ફ્લાઇટ લેન્ડ થાય બાદ બાતમીવાળી મહિલા મુસાફરને અલગ તારવામાં આવી હતી. પૂછપરછ કરતાં તેણે પોતાની પાસે કંઇ વાંધાજનક ચીજ ન હોવાની કેફિયત રજૂ કરી હતી. જોકે, તેની તપાસ કરતાં ટ્રોલી બેગમાંથી 18 એરટાઇટ પેકેટ મળી આવ્યા હતા. જેમાં લીલાશ પડતા ગઠ્ઠાવાળો પદાર્થ હતો. ડિપાર્ટમેન્ટે તેની તપાસ કરાવતાં આ પેકેટમાં પ્રતિબંધિત હાઇડ્રોપોનિક્સ ગાંજો મળી આવ્યો હતો. અધિકારીઓએ આ 19.72 કરોડનો 19.728 કિલો ગાંજો કબજે લઇ ગાંજો લાવનાર મહિલાની તપાસ આદરી છે.