ચાલુ રીક્ષાએ પુત્રીને બચાવવા ગયેલી માતાનું ગબડવાથી કરુણ મોત

• સૂરજકરાડીની ઘટના: દ્વારકામાં વૃદ્ધ ભિક્ષુકનો ફાંસો ખાઇ આપઘાત

ઓખા મંડળના સુરજકરાડી વિસ્તારમાં રહેતા હંસાબેન રમેશભાઈ મારુ નામના 50 વર્ષના મહિલા ગઈકાલે બુધવારે સાંજના સમયે તેમની પુત્રીને સાથે લઈને સુરજકરાડીથી વરવાળા ખાતે જઈ રહ્યા હતા.
ત્યારે દ્વારકા - ઓખા હાઈવે પર મકનપુર ગામ નજીક પહોંચતા હંસાબેનની પુત્રીને જોકું આવી ગયું હતું. જેથી તેણીને રિક્ષામાંથી પડી જતા અટકાવતા પકડવા ગયેલા હંસાબેન પોતે રિક્ષામાંથી પડી ગયા હતા.
જેથી તેમને ઇજાગ્રસ્ત હાલતમાં સ્થાનિક હોસ્પિટલમાં સારવાર અપાયા બાદ વધુ સારવાર સાથે ખંભાળિયાની હોસ્પિટલમાં લઈ જવામાં આવ્યા હતા. જ્યાં તેમનું સારવાર દરમિયાન મૃત્યુ નીપજ્યું હતું. આ બનાવની જાણ મૃતકના પુત્ર વિજયભાઈ રમેશભાઈ મારુએ દ્વારકા પોલીસને કરી છે.

આપઘાત
દ્વારકામાં સ્વૈચ્છિક ભિક્ષુક સ્વીકાર કેન્દ્ર ખાતે રહેતા અને મૂળ કેરળ રાજ્યના અલાટપૂઝા તાલુકાના વતની એવા જય પોલેસ કુરેન જોડુ નામના 74 વર્ષના ક્રિશ્ચન ભિક્ષુકે ગઈકાલે બુધવારે કોઈ અગમ્ય કારણોસર પોતાના હાથે ગળાફાંસો ખાઈ લેતા તેમનું મૃત્યુ નીપજ્યું હતું. જે અંગેની જાણ દ્વારકા પોલીસને કરાઈ છે.