કાયમીની સાથે જ્ઞાન સહાયકોની કરાર આધારિત ભરતી માટેની પ્રક્રિયા કાલથી શરૂ

તા.27થી તા.5 ઓગસ્ટ સુધી અરજી કરી શકાશે: પસંદગી પામેલાની ઓનલાઇન યાદી જાહેર કરાશે

રાજ્યની સરકારી અને ગ્રાન્ટેડ માધ્યમિક તથા ઉચ્ચતર માધ્યમિક શાળાઓમાં જ્ઞાન સહાયકોની નિમણૂકને લઈ શિક્ષણ વિભાગ દ્વારા કાર્યવાહી શરૂૂ કરાઈ છે. જ્ઞાન સહાયક યોજના અંતર્ગત શાળા કક્ષાએ 11 માસ માટે કરાર આધારિત જ્ઞાન સહાયકોની જગ્યાઓ ભરવા માટે ઉમેદવારો પાસેથી ઓનલાઈન અરજી મંગાવવાની પ્રક્રિયા શરૂૂ કરવાની જાહેરાત કરાઈ છે. જેમાં ઉમેદવારો 27 જુલાઈથી લઈને 5 ઓગસ્ટ સુધી ઓનલાઈન અરજી કરી શકશે. ઓનલાઈન અરજી મળ્યા બાદ પસંદગી યાદી જાહેર કરી નિમણૂકની કામગીરી કરવામાં આવશે.

રાજ્યના શિક્ષણ વિભાગ દ્વારા પ્રવાસી શિક્ષક યોજના રદ કરવામાં આવ્યા બાદ શાળાઓમાં કાયમી શિક્ષકોની જગ્યા ન ભરાય ત્યાં સુધી જ્ઞાન સહાયકના માધ્યમથી શિક્ષણ આપવાનું નક્કી કરાયું હતું. આ માટે ગત વર્ષે જ્ઞાન સહાયકોની પસંદગી કરવામાં આવ્યા બાદ ચાલુ વર્ષે ઘણા જ્ઞાન સહાયકોના કરાર રિન્યૂ પણ કરવામાં આવ્યા હતા. જોકે, આમ છતાં રાજ્યની સરકારી અને ગ્રાન્ટેડ માધ્યમિક તથા ઉચ્ચતર માધ્યમિક શાળાઓમાં શિક્ષકોની જગ્યા ખાલી હોવાથી ત્યાં જ્ઞાન સહાયકોની ભરતીને લઈને અનેક રજૂઆતો કરવામાં આવી હતી. જેના પગલે હવે આ જગ્યા પર જ્ઞાન સહાયકોની નિમણૂકને લઈને કાર્યવાહી હાથ ધરવામાં આવી હોવાનું જાણવા મળે છે.

શિક્ષણ વિભાગ અંતર્ગત ગુજરાત રાજ્યની સરકારી અને બિનસરકારી અનુદાનિત માધ્યમિક અને ઉચ્ચતર માધ્યમિક શાળાઓમાં જ્ઞાન સહાયક યોજના માટે શાળા કક્ષાએ 11 માસ માટે કરાર આધારિત જ્ઞાન સહાયક- માધ્યમિક અને જ્ઞાન સહાયક- ઉચ્ચતર માધ્યમિકની જગ્યાઓની ભરતી માટે પસંદગી યાદી તૈયાર કરવા માટે યોગ્ય લાયકાત ધરાવતા ઉમેદવારો પાસેથી ઓનલાઇન અરજીઓ મંગાવવાની કાર્યવાહી શરૂૂ કરવામાં આવી છે. આ જગ્યાઓ માટે ઉમેદવારની વયમર્યાદા ઓનલાઇન અરજી કરવાની તારીખ સુધીની રહેશે. માધ્યમિકમાં જ્ઞાન સહાયકની નિમણૂક માટે 40 વર્ષની વયમર્યાદા નક્કી કરાઈ છે અને માસિક રૂૂ. 24 હજારનું મહેનતાણું મળશે. જ્યારે ઉચ્ચતર માધ્યમિકમાં 42 વર્ષની વયમર્યાદા નક્કી કરાઈ છે, જ્યારે માસિક રૂૂ. 26 હજારનું મહેનતાણું આપવામાં આવશે. ઉમેદવારોએ વેબસાઇટ પર જઇ ઓનલાઇન અરજી કરવાની રહેશે. ઉમેદવારે અરજી કરતા પહેલા વેબસાઇટ પર મૂકેલી જગ્યાઓ માટેની આવશ્યક લાયકાત, વયમર્યાદા, નિમણૂકનો પ્રકાર અને મહેનતાણા અંગેની સૂચનાઓ તથા માર્ગદર્શિકા વાંચી લેવાની રહેશે. આ અરજીઓ રાજ્ય કક્ષાએ, જિલ્લા કક્ષાએ રૂૂબરૂૂ, ટપાલ કે કુરિયર દ્વારા સ્વીકારવામાં આવશે નહીં. તદઉપરાંત આવી મોકલેલી અરજીઓ માન્ય ગણાશે નહીં.