નશાની ટેવ ધરાવતા યુવક સાથે લગ્નની જીદે ચડેલી સગીરાને સમજાવતી ટીમ 181

શહેરમાં રહેતી 17 વર્ષિય સગીરા નશાની ટેવ ધરાવતા યુવક સાથે લગ્નની જીદે ચડતા પરિવાર હેરાન થયો હતો અંતે સગીરાના માતાએ 181માં કોલ કરી મદદ માંગતા અભયમ ટીમે દોડી જઇ સગીરાનું યોગ્ય કાઉન્સેલીંગ કરતા સગીરાએ લગ્નની હઠ છોડી દેતા પરિવારને રાહત મળી હતી.

સામાકાંઠા વિસ્તારમાં રહેતી 17 વર્ષિય સગીરાના માતાએ 181 હેલ્પલાઇનમાં કોલ કરી મદદ માંગતા 181 હેલ્પલાઇનની ટીમના કાઉન્સિલર માધવીબેન સરવૈયા, કોન્સ્ટેબલ ઊર્મિલાબેન કટેસિયા અને પાયલોટ વિજયભાઈ તાત્કાલિક ઘટનાસ્થળે દોડી ગયા હતા. માતાએ પોતાની વ્યથા અભયમ ટીમને જણાવી. તેમની સત્તર વર્ષની દીકરી એક યુવક સાથે લગ્ન કરવા માટે જીદ પકડીને બેસી હતી. પરિવારની ચિંતા એ હતી કે આ યુવક નશાકારક દ્રવ્યોના સેવનનું વ્યસન ધરાવતો હતો, જેના કારણે માતા-પિતા અને પરિવારના સભ્યો સ્પષ્ટપણે આ લગ્નની વિરુદ્ધ હતા. દીકરીની હઠને કારણે ઘરમાં વાતાવરણ તનાવપૂર્ણ બન્યું હતું.

અભયમ ટીમે તરુણી સાથે વિશ્વાસનું વાતાવરણ ઊભું કરીને વાતચીત શરૂૂ કરી. તેણે જણાવ્યું કે લગભગ બે વર્ષ પહેલાં સોશિયલ મીડિયાથી યુવકના સંપર્કમાં આવી હતી. સમય જતાં તેમની મિત્રતા પ્રેમસંબંધમાં બદલાઈ અને તેમણે લગ્ન કરવાનો નિર્ણય લીધો. જો કે તેણે કબૂલ્યું કે યુવક નશાનું સેવન કરે છે. યુવક સાથેની તેની વાતચીત અંગે જાણ છેલ્લા એક વર્ષથી પરિવારમાં થઈ હતી. માતા-પિતા લગ્ન માટે ના પાડી રહ્યા હોવા છતાં તે પોતાની જીદ પર અડગ હતી.

કાઉન્સિલરે સંવેદનશીલતા સાથે તરુણીનું કાઉન્સિલિંગ કર્યું. તેમણે કાયદાકીય રીતે લગ્ન કરવા માટે પુખ્ત વયની હોવું જરૂૂરી છે, તેની સમજ આપી. વળી, યુવકના વ્યસનને કારણે તેના ભવિષ્યના જીવન પર શું ગંભીર અસરો થઈ શકે છે, તે વિશે પણ ચર્ચા કરી. ટીમની સમજાવટ અને માર્ગદર્શનની તરુણીના મન પર ઊંડી અસર થઈ, અંતે તેણે પોતાના માતા-પિતાની મરજી મુજબ અને કાયદાકીય રીતે પુખ્ત વયની થયા બાદ જ લગ્ન કરવાની તૈયારી બતાવી. મહત્વની વાત એ હતી કે તેણે હાલમાં લગ્ન કરવાની જીદ છોડીને પોતાની કારકિર્દી બનાવવા પર ધ્યાન કેન્દ્રિત કરવાનું નક્કી કર્યું હતું. 181 ટીમના યોગ્ય કાઉન્સેલિંગ બદલ પરિવારજનોએ અભયમ ટીમનો આભાર વ્યકત કર્યો હતો.