ચોટીલામાં તસ્કરોનો તરખાટ: આણંદપુર રોડની આઠ દુકાનોનાં શટર તૂટ્યા
ચોટીલા જસદણનાં મુખ્ય આણંદપુર રોડ ઉપર એક સાથે આઠ દુકાનોનાં તાળા તોડી તસ્કરોએ તરખાટ મચાવતા વેપારીઓમાં ફફડાટ સાથે પોલીસ પેટ્રોલીંગ અંગે રોષ ફેલાયો છે છાસવારે બનતા ચોરીના બનાવો ને કારણે લોકોએ કડક કાર્યવાહીની માંગ કરી છે.
પ્રાપ્ત માહિતી મુજબ ચોટીલાનાં સતત વાહાનોની અવર જવર થી ધમધમતા આણંદપુર રોડ ઉપર આવેલા એક કોમ્પલેક્ષમાં ગ્રાઉન્ડ ફ્લોરમાં તેમજ આસપાસની મળી આઠ જેટલી દુકાનોઆનં શટરનાં તાળા તોડી તરખાટ મચાવતા ધંધાર્થીઓમાં ફફડાટ ફેલાયો છે.
વહેલી સવારે ધંધાર્થીઓ દુકાન ખોલવા આવ્યા ત્યારે શટર ઉચા જોતા ચોરી થયાની જાણ થતા પોલીસને ચોરી અંગે જાણ કરતા પોલીસ કાફલો ઘટના સ્થળે તપાસ અર્થે દોડી ગયેલ હતો ગેરેજ, ટ્રેકટર શોરૂૂમ, મિસ્ત્રીકામ,મોટર રીવાઇડીંગ, કટલેરી, કરીયાણા પરચુરણ ચીજવસ્તુઓની દુકાનો હોવાથી કોઇ મોટી રકમનો દલ્લો ગયેલ ન હોવાનું અને સામાન્ય પરચુરણ રકમની ચોરી થયેલ હોવાથી વેપારીઓએ ફરિયાદ નોંધાવ્યાનું ટાળ્યું હોવાનું જાણવા મળે છે પરંતું એક સાથે આઠ દુકાનો તૂટતા લોકોમાં તસ્કરોની રંઝાડનો ફફડાટ જોવા મળે છે.
તસ્કરોનાં તરખાટ પાછળ નબળા પેટ્રોલીંગનો લાભ ચોર ટોળકીએ ઉઠાવ્યો હોવાનું અને એક કરતા વધુ લોકોએ આ ઘટનાને અંજામ આપેલ હોવાનું કહેવાય છે ત્યારે પોલીસે આસપાસ આવેલ સીસીટીવી કેમેરાના ફુટેજ મેળવી ચોર ટોળીની ઓળખ મેળવવા તેમજ તસ્કરી અંગે વધુ તપાસનાં ચક્રો ગતિમાન કર્યા છે.સતત વાહાનોની અવર જવરથી ધમધમતા આ રોડ ઉપર અવાર નવાર ચોરીના બનાવને કારણે લોકોએ આ રોડ ઉપર સઘન રાત્રી પેટ્રોલીંગની માંગ કરેલ છે.