વિસાવદર મત વિસ્તારમાં ગેરકાનૂની પ્રવૃત્તિ અટકાવવા રાઉન્ડ ધ કલોક કાર્યવાહી

36 કર્મચારીની નવ સ્ટેટિક સર્વેલન્સ ટીમ, 45 કર્મચારીની નવ ફલાઇંગ સ્કવોડની ચાંપતી નજર

વિસાવદર વિધાનસભા મતવિસ્તારમાં ગેરકાનૂની રીતે મતદારોને પ્રભાવિત કરવા સહિતની પ્રવૃત્તિઓ અટકાવવા માટે 9 સ્ટેટિક સર્વેલેન્સ ટીમ - SST અને એટલી જ ફ્લાઈંગ સ્કવોડ ટીમ - FST ટીમ કાર્યરત છે. 36 કર્મચારીઓની બનેલી 9 સ્ટેટિક સર્વેલેન્સ ટીમ અને 45 કર્મીઓની 9 ફ્લાઈંગ સ્કવોડ ટીમ દ્રારા 87- વિસાવદર વિધાનસભા મતવિસ્તારમાં ગેરકાનૂની પ્રવૃત્તિઓ અટકાવવા ચાંપતી નજર રાખવામાં આવી રહી છે.
વિધાનસભા હદ વિસ્તારના મુખ્ય પ્રવેશ દ્વાર પર તૈનાત SST એટલે સ્થાયી દેખરેખ ટીમ ભેંસાણના નવી ધારી ગુંદાળી, વિસાવદરના વેકરીયા અને જૂનાગઢના બિલખા ખાતે કાર્યરત છે. આ ટીમ સંવેદનશીલ વિસ્તાર કે કસ્બાઓની આસપાસ આ ટુકડીઓ પાસે કામગીરી કરે છે. મતદાન વિસ્તારમાં ગેરકાનુની રીતે દારૂૂ, લાંચની વસ્તુઓ, માતબર રોક્ડ રકમ, શસ્ત્રો અને દારૂૂગોળાની હેરાફેરી તેમજ અસામાજીક તત્વોની હિલચાલ પર ચાંપતી નજર રાખી રહી છે. ઉપરાંત મુખ્ય માર્ગો પર પસાર થતા વાહનોની ચકાસણી કરવામાં આવે છે તેમજ આ તમામ પ્રક્રિયાની વિડિયોગ્રાફી કરવામાં આવે છે.

FST એટલે કે શિઘ્ર કાર્ય ટુકડીઓ ભેસાણ મામલતદાર કચેરી,વિસાવદર પ્રાંત કચેરી, અને જૂનાગઢ ગ્રામ્ય મામલતદાર કચેરી ખાતેથી મતદારોને રિઝવવા માટે ગેરકાનુની રોકડ લેવડ દેવડ અથવા દારૂૂનું વિતરણ અથવા અન્ય કોઇ પણ ચીજવસ્તુનો ઉપયોગ થઇ રહ્યો હોવાની શંકા જાય અથવા મતદારોને લાંચ આપવાનો કોઇ પ્રયાસ થઇ રહ્યો હોય તો તેને પકડવા માટે આ ટુકડી કામગીરી કરી રહી છે.

ઉપરાંત 24 કલાક કંટ્રોલ રૂૂમમાંથી મળેલી ફરીયાદોનો સમય મર્યાદામાં નિકાલ કરવો અને કરેલી કાર્યવાહીનું રેકોર્ડિંગ કરવામાં આવે છે. ઉલ્લેખનીય છે કે જિલ્લા ચૂંટણી અધિકારી અને કલેક્ટર અનિલકુમાર રાણાવસિયાના માર્ગદર્શનમાં ચૂંટણી તંત્ર નિષ્પક્ષ, ન્યાયી અને પારદર્શક રીતે કામગીરી કરી રહ્યું છે.

ભેસાણ તાલુકાના ખેડૂતોનો અચૂક મતદાનનો સંકલ્પ
ભેસાણ તાલુકાના પ્રગતિશીલ ખેડૂતોએ વિસાવદર વિધાનસભા પેટા ચૂંટણીમાં તા. 19મી જૂને અચૂક મતદાનનો સંકલ્પ કર્યો છે, સાથે જ આ ખેડૂતો અન્ય ખેડૂતોને મતાધિકારનો અચૂક ઉપયોગ માટે પ્રેરિત પણ કરશે. ભેસાણ એપીએમસી ખાતે જિલ્લા ચૂંટણી તંત્ર દ્વારા સિસ્ટમેટિક વોટર્સ એજ્યુકેશન એન્ડ ઇલેક્ટોરલ પાર્ટીશીપેશન - SVEEP અંતર્ગત આયોજિત મતદાન જાગૃતિના કાર્યક્રમમાં જનરલ ઓબ્ઝર્વર ડો. હીરાલાલ ઉપસ્થિત રહ્યા હતા અને ખેડૂતોને પ્રકૃતિના મહત્વની સાથે મતદાનના મહત્વ વિશે પણ માર્ગદર્શન કર્યું હતું. ગ્રીન ડેમોક્રેસી બાય ગ્રીન ઇલેક્શન થીમ ઉપર આયોજિત કાર્યક્રમમાં મહિલા ખેડૂતોની પણ વિશેષ ઉપસ્થિતિ રહી હતી અને તેમને રોપા આપીને મતદાન માટે પ્રોત્સાહિત કરવામાં આવ્યા હતા. આ તકે જિલ્લા શિક્ષણ અધિકારી અને SVEEP ના નોડલ લતાબેન ઉપાધ્યાય, જિલ્લા યુવા વિકાસ અધિકારી નીતાબેન વાળા, જિલ્લાના આત્મા પ્રોજેક્ટના ડાયરેક્ટર દિપક રાઠોડ, મદદનીશ ખેતીવાડી અધિકારી ગોંડલીયા સહિતના અધિકારીઓ અને ખેડૂત ભાઈઓ બહેનો મોટી સંખ્યામાં ઉપસ્થિત રહ્યા હતા.

મતદારી યાદી રાજકીય પક્ષોને આપવામાં આવી
87- વિસાવદર વિધાનસભા પેટા ચૂંટણી અન્વયે આગામી તારીખ 19 જૂનના રોજ મતદાન યોજનાર છે. ત્યારે ભારતીય ચૂંટણી પંચની સૂચના અનુસાર 87- વિસાવદર વિધાનસભા મત વિસ્તારની પેટા ચૂંટણી 2025 અન્વયે વિસાવદર વિધાનસભા મતદાર વિભાગની તારીખ 1/4/2025 (લાયકાત તારીખ) સંદ્રભે અધતન કરેલ મતદાર યાદી માન્ય રાજકીય પક્ષોના હરીફ ઉમેદવાર/ ઉમેદવારના પ્રતિનિધિઓને વિનામૂલ્યે આપવામાં આવી હતી. એમ મતદાર નોંધણી અધિકારી 87- વિસાવદર વિધાનસભા મત વિસ્તાર અને પ્રાંત અધિકારી વિસાવદરની એક અખબારી યાદીમાં જણાવવામાં આવ્યું છે.