રાજકોટ યાર્ડ કપાસથી ઉભરાયું: 29000 મણ આવક

સોયાબીન, ઘઉં, ચણા, લસણ, સિંગફાડા, અળદ, મગ, કાળા તલ, સફેદ તલ અને જીરૂની મબલક આવક નોંધાઇ

રાજકોટ માર્કેટિંગ યાર્ડ ગુજરાતના મહત્વપુર્ણ કૃષિ બજારોમાની એક છે. જયાં ખેડુતો પોતાની તૈયાર થયેલી જણસી વેચાણ માટે લાવે છે. જેમાં દરરોજ જણસી વેચાણ માટે આવે છે. યાર્ડમાં આજે કપાસ, સોયાબીન, ઘઉં, ચણા, લસણ, સિંગફાડા, અળદ, મગ, કાળા તલ, સફેદ તલ અને જીરૂની મબલક આવક થવા પામી હતી. આજે કપાસની મબલક આવક નોંધાતા સમગ્ર યાર્ડ જણસીથી છલકાયું હતું.

આજે અંદાજે 1100 થી વધુ વાહનોમાં જણસીની આવક થતા યાર્ડમાં વાહનોની અવર-જવર અને ગાડીઓમાંથી ઉતરતા પાકના ઢગલાઓથી યાર્ડને જીવંત બનાવી દીધું હતું. યાર્ડમાં આજે સૌથી વધુ કપાસની 29000 મણ આવક નોંધાતા યાર્ડમાં સફેદ ચાદર બિછાવી હોય તેવો માહોલ સર્જાયો હતો. આ ઉપરાંત સોયાબીન 3500 મણ, ઘઉં 6000 મણ, ચણા 5000 મણ, લસણ 4200 મણ, અળદ 7000 મણ, મગ 1200 મણ, સફેદ તલ 4000 મણ, જીરૂ 2800 મણ અને કાળા તલની 1500 મણ આવક થવા પામી હતી.

જણસીઓ ભરેલા વાહનોને માર્કેટ યાર્ડમાં ક્રમવાર પ્રવેશ આપી ઉતરાઇ કરવામાં આવી હતી. રાજકોટ માર્કેટયાર્ડના ચેરમેન જયેશભાઇ બોઘરા, વાઇસ ચેરમેન તથા ડિરેકટરો સહીતનાં સ્ટાફ દ્વારા આ ઉતરાઇની વ્યવસ્થા કરવામાં આવી હતી.