મેઘપરમાં પરપ્રાંતીય શ્રમિકનો ગળેફાંસો ખાઈ આપઘાત

મૂળ બિહાર રાજ્યના વતની અને લાલપુર ના મેઘપર ગામમાં રહીને મજૂરી કામ કરતા પર પ્રાંતિય શ્રમિક યુવાને કોઈ અગમ્ય કારણોસર ગળાફાંસા દ્વારા આત્મહત્યા કરી લીધી છે.

આ બનાવની વિગત એવી છે કે બિહાર રાજ્યના વતની અને હાલ લાલપુર તાલુકાના મેઘપર ગામના કિશોરસિંહ માનસંગજી પિંગળની ભાડાની ઓરડીમાં રહેતા પ્રકાશ રામબાબુ પાસવાન નામના 20 વર્ષના પર પ્રાંતિય શ્રમિક યુવાને ગઈકાલે પોતાની ઓરડીમાં કોઈ અગમ્ય કારણોસર સિમેન્ટના પીઢિયા માં દોરડું બાંધી ગળાફાંસા દ્વારા આપઘાત કરી લીધો હતો. આ બનાવ અંગે આકાશ કુમાર રામબાબુ પાસવાને પોલીસને જાણ કરતા મેઘપર પોલીસે બનાવના સ્થળે દોડી મૃતદેહનો કબજો સંભાળ્યો છે, અને વધુ તપાસ હાથ ધરી છે.

પટકાઈ પડતા અપમૃત્યુ
જામનગર નજીક સિક્કા ના દરિયામાં લાંગરેલા એક બાર્જ માં કલર કામની મજૂરી કરી રહેલા પર પ્રાંતીય શ્રમિક યુવાનનું નીચે પટકાઈ પડ્યા પછી અપમૃત્યુ થયું છે.

આ બનાવની વિગત એવી છે કે મૂળ ઉત્તર પ્રદેશના વતની અને હાલ સિક્કામાં આવેલી ગુજરાત એન્જિનિયરિંગ વર્કસ કંપનીમાં કામ કરતો રામવરણ જસાગ્ગુ નામના 30 વર્ષનો પરપ્રાંતિય યુવાન કે જે સિક્કા નજીકના દરિયામાં લાંગરેલા એક બાર્જમાં કલર કામની મજૂરી કરી રહ્યો હતો, જે દરમિયાન અકસ્માતે નીચે પટકાઇ પડ્યો હતો. જેથી તેને દરિયામાંથી બહાર લાવી સારવાર માટે હોસ્પિટલમાં ખસેડવામાં આવ્યો હતો, જ્યાં તેનું મૃત્યુ નીપજ્યું હોવાનું જાહેર કરાયું હતું.
આ બનાવ અંગે તેની સાથે કામ કરતા જહાંગીર જુમ્માભાઈએ પોલીસને જાણ કરતાં સિક્કા પોલીસે મૃતદેહનો કબજો સંભાળી વધુ તપાસ હાથ ધરી છે.