કોડીનાર-વેરાવળ નેશનલ હાઈવે પર સરસ્વતી નદી પરના પૂલ પરથી ભારે વાહનો પસાર થવા પર પ્રતિબંધ

કોડિનાર-વેરાવળ નેશનલ હાઈવે પર પ્રાંચીથી આગળ જતાં સરસ્વતી નદી પરનો બ્રીજ જર્જરીત હાલતમાં હોવાથી અને સમારકામ કરાવવાની જરૂૂરિયાત હોવાથી ભવિષ્યમાં અકસ્માતની દૂર્ઘટના ન બને તે માટે પુલ પરથી ભારે વાહનોની અવર-જવર બંધ કરવા કલેક્ટર શ્રી એન.વી.ઉપાધ્યાય દ્વારા જાહેરનામું પ્રસિદ્ધ કરાયું છે.
આ જાહેરનામા અનુસાર કોડિનાર-વેરાવળ નેશનલ હાઈવે પર પ્રાંચીથી આગળ જતાં સરસ્વતી નદી પરના નેશનલ હાઈવે ઓથોરિટી ઓફ ઈન્ડિયા હસ્તક આવેલ બ્રીજ પરથી ભારે વાહનો પસાર કરવા પર પ્રતિબંધ મૂકવા તેમજ આ જાહેરનામાથી પ્રતિબંધ ફરમાવેલા વાહનોના વૈકલ્પિક રૂૂટ તરીકે પ્રાંસલી માર્કેટીંગ યાર્ડ પાસે આવેલા ઓવર બ્રીજના સર્વિસ રોડથી ગોજારા કાદા પાસે આવેલ ઓવરબ્રીજ નીચેથી પ્રાંચી-ઘંટીયા ગામમાં આવવા-જવા નક્કી કરાયું છે.

આ પુલ પરથી બાર પેસેન્જરની ક્ષમતાથી ઉપરના મેક્સી કેબ વાહનો તેમજ 7500 કિ.ગ્રાથી વધુ વજન ધરાવતા તમામ વાહનોના પરિવહન પર પ્રતિબંધ મૂક્યો છે. આ ઉપરાંત, જેમાં વિદ્યાર્થીઓનું પરિવહન થતું હોય તેવા વાહનો પર પણ પ્રતિબંધ મૂકવામાં આવ્યો છે. આ જાહેરનામું પ્રસિદ્ધ થયા તારીખથી તા. 30/06/2026 સુધી અમલમાં રહેશે.