કાલાવડ નાકા બહાર બે આંખલાઓની લડાઈમાં બુઝુર્ગ ગંભીર રીતે ઘાયલ

જામનગરમાં કાલાવડ નાકા બહાર આવેલા પૂલ ઉપર બપોરે બે આંખલાઓ યુદ્ધે ચડ્યા હતા, જેમાં એક બુઝુર્ગ ઘાયલ થયા છે, અને સારવાર માટે હોસ્પિટલમાં ખસેડાયા છે. જામનગરમાં કાલાવડ નાકા બહાર રહેતા ફારુકભાઈ ખત્રી નામના બુઝુર્ગ મંગળવારે બપોરે કાલાવડ નાકા બહારના પૂલ પર થી પસાર થઈ રહ્યા હતા, તે દરમિયાન એકાએક બે આંખલાઓ યુદ્ધે ચડ્યા હતા, અને તેઓએ ફારુકભાઈ ખત્રીને હડફેટમાં લઈ લેતાં ઇજાગ્રસ્ત બન્યા હતા. તેઓને જામનગરની જી.જી. હોસ્પિટલમાં સારવાર અપાઇ છે, જોકે તેઓ હાલ ભયમુક્ત છે. બંને આંખલાઓ ને લડાઈ લાંબો સમય ચાલી હતી, અને તેટલા સમય માટે બહારના પુલ ઉપરથી વાહન વ્યવહાર થંભી ગયો હતો. જોકે બંને આંખલાઓની લડાઈ આખરે ખતમ થઈ હતી અને વાહન વ્યવહાર પૂર્વવત બન્યો હતો.