કોટડાસાંગાણીના પીપલાણા ગામે દંપતી વચ્ચે ઝઘડો થતાં પતિનો આપઘાતનો પ્રયાસ

જૂનાગઢમાં સગીરે બીમારીની વધુ પડતી ગોળીઓ પી લેતા તબિયત લથડી

કોટડાસાંગાણીના પીપલાણા ગામે ખેત મજૂરી અર્થે આવેલા દંપતિ વચ્ચે ઝઘડો થતા પતિએ ઝેરી દવા પી લીધી હતી. આપઘાતનો પ્રયાસ કરનાર યુવકને તાત્કાલિક સારવાર માટે ખસેડફવામાં આવ્યો હતો. કોટડા સાંગાણી તાલુકાના પીપલાણા ગામે રહેતા બાબુભાઈ જીવાભાઇની વાડીએ ખેત મજૂરી કરતા વનરાજ હરમલભાઈ નીનામા નામના 22 વર્ષના યુવાને રાત્રીના અઢી વાગ્યાના અરસામાં ઝેરી દવા પી લીધી હતી. યુવકને ઝેરી અસર થતા તાત્કાલિક સારવાર માટે સિવિલ હોસ્પિટલમાં દાખલ કરવામાં આવ્યો હતો. પ્રાથમિક પૂછપરછમાં વનરાજ નીનામા અને તેની પત્ની વચ્ચે છોકરા મુદ્દે ઝઘડો થતાં ઝેરી દવા પી લીધી હોવાનું જાણવા મળ્યું છે.

આ ઉપરાંત અન્ય બીજા બનાવમાં જૂનાગઢમાં બીલખા રોડ ઉપર આવેલા ઇન્દિરાનગરમાં રહેતા અરમાન આરીફભાઈ બાઘડા નામનો 15 વર્ષનો સગીર પોતાના ઘરે હતો. ત્યારે કોઈ અગમ્ય કારણસર બીમારીની વધુ પડતી ગોળીઓ પી લીધી હતી. સગીરની તબિયત લથડતા તાત્કાલિક સારવાર માટે રાજકોટ સિવિલ હોસ્પિટલમાં ખસેડવામાં આવ્યો હતો. ઉપરોક્ત બંને બનાવ અંગે પોલીસે નોંધ કરી વધુ તપાસ હાથ ધરી છે.