એર ઈન્ડિયાના તમામ બોઇંગ ડ્રીમલાઇનરની થશે તપાસ: અમદાવાદ વિમાન દુર્ઘટના બાદ DGCAનો મોટો નિર્ણય
અમદાવાદ વિમાન દુર્ઘટના બાદ, DGCA (નાગરિક ઉડ્ડયન મહાનિર્દેશાલય) એ એક મોટો નિર્ણય લીધો છે.DGCAએ તમામ બોઇંગ ડ્રીમલાઇનર વિમાનોની સુરક્ષાની તપાસ કરવાની કામગીરી કડક બનાવી દીધી છે
અમદાવાદમાં એર ઇન્ડિયાની લંડન જતી ફ્લાઇટ AI171 ના ભયાનક અકસ્માત બાદ આ નિર્ણય લેવામાં આવ્યો છે. DGCAએ એર ઇન્ડિયાને 15 જૂન 2025ની મધ્યરાત્રિ (00:00 કલાક) થી ભારતથી ઉડાન ભરતા પહેલા ફરજિયાત રીતે એક વખતની ખાસ તપાસ પ્રક્રિયા લાગુ કરવાનો આદેશ આપ્યો છે.
DGCAએ ફ્લાઇટ પહેલાં ઘણી મહત્વપૂર્ણ તકનીકી તપાસનો નિર્દેશ આપ્યો છે, જેમાં ફ્યુઅલ પેરામીટર મોનિટરિંગ, કેબિન એર કોમ્પ્રેસર સિસ્ટમ, ઇલેક્ટ્રોનિક એન્જિન કંટ્રોલ ટેસ્ટ, એન્જિન ફ્યુઅલ એક્ટ્યુએટર ઓપરેશન, ઓઇલ સિસ્ટમ અને હાઇડ્રોલિક સિસ્ટમની સર્વિસ ચેકનો સમાવેશ થાય છે. આ સાથે, ટેકઓફ પહેલાં પરિમાણોની યોગ્ય રીતે સમીક્ષા કરવા માટે પણ સૂચના આપવામાં આવી છે.
આ ઉપરાંત, DGCAએ આદેશ આપ્યો છે કે ટ્રાન્ઝિટ નિરીક્ષણમાં 'ફ્લાઇટ કંટ્રોલ નિરીક્ષણ' ઉમેરવામાં આવે અને આ પ્રક્રિયા આગામી આદેશ સુધી ચાલુ રાખવી જોઈએ. ઉપરાંત, બે અઠવાડિયામાં પાવર ખાતરી તપાસ કરવાનું ફરજિયાત બનાવવામાં આવ્યું છે. ઉપરાંત, છેલ્લા 15 દિવસમાં બોઇંગ ડ્રીમલાઇનર વિમાનોમાં વારંવાર આવતી ટેકનિકલ ખામીઓ (સ્નેગ્સ) ની સમીક્ષા કરવા અને તેમને લગતા તમામ જાળવણી કાર્યનો વહેલી તકે નિકાલ કરવાના આદેશ આપવામાં આવ્યા છે.
મળતી માહિતી મુજબ, DGCAનું આ પગલું એર ઇન્ડિયાની સુરક્ષા વ્યવસ્થાને વધુ મજબૂત બનાવવાના ઉદ્દેશ્યથી લેવામાં આવ્યું છે જેથી ભવિષ્યમાં આવી ઘટનાઓને અટકાવી શકાય અને મુસાફરોના જાન-માલની સલામતી સુનિશ્ચિત કરી શકાય.
ગુરુવારે એટલે કે ગઈ કાલે અમદાવાદથી લંડન જઈ રહેલું એર ઈન્ડિયાનું બોઈંગ 787 ડ્રીમલાઈનર વિમાન ટેકઓફ થયાના થોડા સમય પછી મેડિકલ કોલેજ કેમ્પસમાં ક્રેશ થયું હતું. વિમાનમાં 230 મુસાફરો અને 12 ક્રૂ સભ્યો હતા. એર ઈન્ડિયાએ પુષ્ટિ આપી છે કે આ અકસ્માતમાં 241 લોકોના મોત થયા છે. એક મુસાફર ચમત્કારિક રીતે બચી ગયો છે. તે હોસ્પિટલમાં સારવાર હેઠળ છે.
