હાલારમાં મેડિકલ ઇમરજન્સી માટે 35 એમ્બ્યુલન્સ તૈનાત

કર્મચારીઓને 24 કલાક ખડેપગે રહેવા કલેકટરની સુચના, સંવેદનશીલ વિસ્તારમાં વધારે 108 ફાળવવાય

હાલમાં ભારત અને પાકિસ્તાન વચ્ચે સર્જાયેલી તણાવપૂર્ણ સ્થિતિ જે યુદ્ધ જેવી પરિસ્થિતિનું નિર્માણ કરી રહી છે, તેના પગલે ગુજરાત રાજ્યનું સમગ્ર વહીવટી તંત્ર એલર્ટ મોડમાં કાર્યરત છે અને કોઈપણ સંભવિત ઇમર્જન્સી કે કટોકટીની પરિસ્થિતિને પહોંચી વળવા માટે સરકાર દ્વારા તમામ સ્તરે પૂરતા પગલાં લેવામાં આવી રહ્યા છે, જેના ભાગરૂૂપે તાજેતરમાં રાજ્ય સરકાર દ્વારા તાત્કાલિક રાહત અને તબીબી સહાય પહોંચાડવાની ક્ષમતા વધારવા હેતુસર અમદાવાદથી કુલ 75 નવી એમ્બ્યુલન્સ સરહદી અને વ્યૂહાત્મક રીતે મહત્વના ગણાતા જિલ્લાઓ માટે મોકલવામાં આવી છે, જેમાં જામનગર જિલ્લા માટે 20 નવી એમ્બ્યુલન્સ, દેવભૂમિ દ્વારકા જિલ્લા માટે 15 નવી એમ્બ્યુલન્સ ફાળવવામાં આવી છે, જ્યારે ભુજ અને કચ્છ વિસ્તાર માટે પણ બાકીની વધારાની એમ્બ્યુલન્સ મોકલવામાં આવી છે, જેથી આ વિસ્તારોમાં કટોકટીના સમયે ઝડપી અને સચોટ તબીબી સેવા સુનિશ્ચિત કરી શકાય; રાજ્ય સરકારના આ નિર્ણય અનુસાર મોકલવામાં આવેલી દરેક નવી એમ્બ્યુલન્સમાં તાલીમબદ્ધ બે સ્ટાફને ફરજ પર મૂકવામાં આવ્યા છે.

જેઓ સંબંધિત જિલ્લાના કલેકટરની સૂચના અને માર્ગદર્શન મુજબ નિર્ધારિત સ્થળોએ 24 કલાક ખડેપગે ફરજ બજાવવા માટે તૈયાર રહેશે અને કોઈપણ ઇમર્જન્સીની સ્થિતિમાં તુરંત કાર્યવાહી કરશે; વર્તમાન તણાવપૂર્ણ પરિસ્થિતિને ધ્યાનમાં રાખીને તંત્ર દ્વારા લેવાયેલું આ પગલું નાગરિકોની સુરક્ષા અને સ્વાસ્થ્ય પ્રત્યે સરકારની પ્રતિબદ્ધતા દર્શાવે છે તથા સંભવિત જોખમો સામે પૂરતી તૈયારી સુનિશ્ચિત કરવાનો એક મહત્વપૂર્ણ ભાગ છે, જેથી કટોકટી સર્જાય ત્યારે ઓછામાં ઓછું નુકસાન થાય અને જરૂૂરિયાતમંદ લોકોને તાત્કાલિક તબીબી મદદ મળી રહે; આમ, રાજ્ય સરકાર દ્વારા જામનગર, દેવભૂમિ દ્વારકા અને કચ્છ સહિતના સંવેદનશીલ વિસ્તારોમાં વધારાની એમ્બ્યુલન્સ ફાળવીને ઇમર્જન્સી મેડિકલ સર્વિસિસને વધુ સુદૃઢ બનાવવાનો પ્રયાસ કરવામાં આવ્યો છે, જે વર્તમાન ભૌગોલિક-રાજકીય પરિસ્થિતિમાં તંત્રની સજ્જતાનો નિર્દેશ કરે છે.