ચોથા તબક્કાના મતદાને 2019નો રેકોર્ડ તોડ્યો: સમીકરણો બદલાયા

લોકસભા ચૂંટણીના ચોથા તબક્કામાં સોમવારે 10 રાજ્યો અને કેન્દ્રશાસિત પ્રદેશોની 96 બેઠકોમાં 67 ટકાથી વધુ મતદાન સાથે અગાઉના તબક્કા કરતાં વધુ ઝડપી મતદાન થયું હતું. ચૂંટણી પંચ (ઊઈ) દ્વારા શેર કરાયેલા નવીનતમ મતદાન ડેટામાં આ માહિતી આપવામાં આવી છે. પંચના જણાવ્યા અનુસાર, મધરાતે 12.45 વાગ્યા સુધીના ડેટા મુજબ 67.25 ટકા મતદાન થયું છે, જે 2019ની સંસદીય ચૂંટણીના આ તબક્કે કરતાં 1.74 ટકા વધુ છે. કમિશને એક નિવેદનમાં કહ્યું કે આ કામચલાઉ આંકડા છે અને તેને અપડેટ કરવામાં આવી રહ્યા છે. લોકસભા ચૂંટણીના ચોથા તબક્કા બાદ અત્યાર સુધીમાં 23 રાજ્યો અને કેન્દ્રશાસિત પ્રદેશોની 379 બેઠકો પર મતદાન પૂર્ણ થયું છે.

આંધ્ર પ્રદેશ, સિક્કિમ અને અરુણાચલ પ્રદેશની વિધાનસભા ચૂંટણી માટે પણ મતદાન પૂર્ણ થઈ ગયું છે. વર્તમાન સામાન્ય ચૂંટણીમાં પ્રથમ તબક્કામાં 66.14 ટકા, બીજા તબક્કામાં 66.71 ટકા અને ત્રીજા તબક્કામાં 65.68 ટકા મતદાન થયું હતું. ચોથા તબક્કાના મતદાન દરમિયાન આંધ્રપ્રદેશ અને પશ્ચિમ બંગાળમાં હિંસાની છૂટાછવાયા બનાવો બન્યા હતા.

ચોથા તબક્કામાં તેલંગાણાની તમામ 17, આંધ્રપ્રદેશની 25, ઉત્તર પ્રદેશની 13, બિહારની પાંચ, ઝારખંડની ચાર, મધ્યપ્રદેશની આઠ, મહારાષ્ટ્રની 11, ઓડિશાની ચાર, પશ્ચિમ બંગાળની આઠ અને આઠ બેઠકો પર મતદાન થશે. જમ્મુ-કાશ્મીરની એક બેઠક પર મતદાન થયું હતું. પશ્ચિમ બંગાળમાં ફરી એકવાર પ્રભાવશાળી 78.44 ટકા મતદાન નોંધાયું છે, જે આ તબક્કામાં રાજ્યો/ કેન્દ્રશાસિત પ્રદેશોમાં સૌથી વધુ છે.

આ પછી આંધ્રપ્રદેશમાં 78.25 ટકા અને ઓડિશામાં 73.97 ટકા મતદાન થયું હતું. બંધારણની કલમ 370 નાબૂદ કર્યા પછી ખીણમાં પ્રથમ લોકસભા ચૂંટણી દરમિયાન જમ્મુ અને કાશ્મીરના શ્રીનગર મતવિસ્તારમાં 37.98 ટકા મતદાન થયું હતું અને ચૂંટણી પંચે કહ્યું હતું કે તે દશકોમાં સૌથી વધુ મતદાન હતું. બિહારમાં 57.06 ટકા, ઝારખંડમાં 65.31 ટકા, મહારાષ્ટ્રમાં 59.64 ટકા, તેલંગાણામાં 64.87 ટકા અને ઉત્તર પ્રદેશમાં 58.05 ટકા મતદાન થયું હતું. મધ્યપ્રદેશમાં 71.72 ટકા મતદાન નોંધાયું હતું.

એક વીડિયો ક્લિપ સામે આવ્યા બાદ ચૂંટણી અધિકારીઓએ તેલંગાણાની હૈદરાબાદ લોકસભા સીટના બીજેપી ઉમેદવાર માધવી લતા વિરુદ્ધ કેસ નોંધ્યો છે. વીડિયોમાં તે કથિત રીતે બુરખો પહેરેલી મહિલા મતદારોને તેમના ચહેરા બતાવવા માટે કહી રહી હતી. આંધ્ર પ્રદેશમાં, તેલુગુ દેશમ પાર્ટી (ટીડીપી) અને વાયએસઆરસીપીએ એકબીજા પર પલનાડુ, કુદ્દાપહ અને અન્નમૈયા જિલ્લામાં હિંસાનો આરોપ લગાવ્યો. આંધ્રમાં પણ વાયએસ આરસીપી અને ટીડીપીએ મતદાનમાં ગરબડીના સામસામ આક્ષેપો કર્યા છે.

લોકસભા ચૂંટણીના ચોથા તબક્કામાં પશ્ચિમ બંગાળના આઠ સંસદીય મતવિસ્તારોમાં હિંસાના છૂટાછવાયા બનાવો નોંધાયા હતા. બીરભૂમ અને બર્ધમાન-દુર્ગાપુર લોકસભા બેઠકો હેઠળના વિવિધ વિસ્તારોમાં તૃણમૂલ કોંગ્રેસ અને ભાજપના કાર્યકરો વચ્ચે અથડામણ થઈ હતી. ચૂંટણી પંચે જણાવ્યું હતું કે બપોરે 1 વાગ્યા સુધી ઇવીએમમાં ખામી અને એજન્ટોને બૂથમાં પ્રવેશતા રોકવાની લગભગ 1,700 ફરિયાદો નોંધાઈ હતી.

હાઇકોર્ટના જજ રહી ચૂકેલા ભાજપ ઉમેદવાર સામે હત્યાના પ્રયાસનો ગુનો
પશ્ચિમ બંગાળની તમલુક લોકસભા સીટ પરથી ભાજપના ઉમેદવાર અને કલકત્તા હાઈકોર્ટના પૂર્વ ન્યાયાધીશ અભિજીત ગંગોપાધ્યાયે હાઈકોર્ટમાં અરજી કરી મદદ માંગી છે. પોલીસે તેની સામે હત્યાના પ્રયાસનો ગુનો નોંધ્યો છે. તેણે પોલીસ પર બિનજરૂૂરી કાર્યવાહી કરવાનો અને તેને હેરાન કરવાનો આરોપ લગાવ્યો છે. જસ્ટિસ જય સેનગુપ્તાની કોર્ટમાં પૂર્વ ન્યાયાધીશ અભિજીત ગંગોપાધ્યાય સાથે સંબંધિત મામલો રજૂ કરવામાં આવ્યો છે. પોલીસ પર દુર્ભાવનાપૂર્ણ અને બિનજરૂૂરી પગલાં લેવાનો આરોપ મૂકતાં ગંગોપાધ્યાયના એડવોકેટ રાજદીપ મજુમદારે કોર્ટને જણાવ્યું કે તેમના અસીલને પ્રચાર કરતા રોકવા માટે એફઆઇઆર દાખલ કરવામાં આવી છે.