15 ઓગસ્ટે દિલ્હીમાં અમેરિકા જેવા હુમલાની આશંકા, તાકીદની બેઠક

ટાર્ગેટ કિલિંગની સંભાવનાના પગલે પોલીસતંત્ર એલર્ટ

અમેરિકાના રાષ્ટ્રપતિ પદના ઉમેદવાર ડોનાલ્ડ ટ્રમ્પ પર થયેલા હુમલા બાદ દિલ્હી પોલીસ પણ સતર્ક થઈ ગઈ છે. 15 ઓગસ્ટે આતંકવાદી અથવા ખાલિસ્તાની હુમલાની સંભાવનાને ધ્યાનમાં રાખીને, દિલ્હી પોલીસ કમિશનર સંજય અરોરાએ તેમના પોલીસ અધિકારીઓની બેઠક યોજી હતી. તેમણે કહ્યું કે 15 ઓગસ્ટે દેશમાં ડોનાલ્ડ ટ્રમ્પ જેવો હુમલો થઈ શકે છે. આવી સ્થિતિમાં આપણે સાવધાન રહેવું પડશે. કમિશનરે તૈયારીઓ સંદર્ભે મંગળવારે બીજી બેઠક બોલાવી હતી. બીજી તરફ 15મી ઓગસ્ટે ટાર્ગેટ કિલિંગના ઈનપુટ મળ્યા છે. પોલીસ આ બાબતે અત્યારથી જ સતર્ક હોય તેવું લાગી રહ્યું છે.

દિલ્હી પોલીસના અધિકારીઓના જણાવ્યા અનુસાર, 15 ઓગસ્ટની તૈયારીઓ એક મહિના અગાઉથી શરૂૂ થઈ જાય છે. તૈયારીઓને લઈને પોલીસ કમિશનરે એક બેઠકમાં વરિષ્ઠ અધિકારીઓ સહિત તમામ પોલીસ અધિકારીઓને બોલાવ્યા હતા. અમેરિકાના પૂર્વ રાષ્ટ્રપતિ ડોનાલ્ડ પર હુમલાનું ઉદાહરણ આપતા તેમણે કહ્યું કે, દિલ્હીમાં આવી ઘટનાઓ ન થવી જોઈએ. આ ઉપરાંત પોલીસ કમિશનરે વહેલી તકે સ્ટાફને સક્રિય કરવા જણાવ્યું હતું. ગયા વર્ષની જેમ આ વર્ષે પણ સુરક્ષાના એવા જ પગલા લેવા જોઈએ.

બીજી તરફ, સ્પેશિયલ સેલના વરિષ્ઠ અધિકારીઓના જણાવ્યા અનુસાર, આતંકવાદી હુમલા અંગે હજુ સુધી ઈનપુટ મળ્યા નથી. અધિકારીઓનું કહેવું છે કે આ વખતે આતંકી હુમલાની શક્યતા ઓછી છે. આ વખતે ગુંડાઓ અને બદમાશો ટાર્ગેટ કિલિંગ કરી શકે છે. કેટલાક ઇનપુટ પ્રાપ્ત થયા છે. ઉપરાંત, ખાલિસ્તાન સમર્થક ગુરુપંત પન્નુ 15 ઓગસ્ટે વિવિધ સ્થળોએ ખાલિસ્તાન તરફી પોસ્ટર લગાવીને દેશનું વાતાવરણ બગાડવાનો પ્રયાસ કરશે. પન્નુ તરફથી દિલ્હીનું વાતાવરણ બગાડવાની પૂરેપૂરી શક્યતા અને ઇનપુટ છે.