ચૂંટણી પરિણામો પહેલા જ રોકાણકારો મોજમાં..મૂડી 13.73 લાખ કરોડ વધી, એગ્ઝિટ પોલની રેકોર્ડબ્રેક અસર

એક્ઝિટ પોલ બાદ અને લોકસભા ચૂંટણી 2024ના પરિણામો પહેલા શેરબજારમાં જબરદસ્ત ઉછાળો આવ્યો છે. માહિતી અનુસાર, BSEના મુખ્ય સૂચકાંક સેન્સેક્સમાં 2500 પોઈન્ટથી વધુનો વધારો જોવા મળ્યો છે. તે જ સમયે, નિફ્ટીમાં પણ 730 પોઈન્ટથી વધુનો વધારો જોવા મળ્યો છે. શેરબજારમાં ત્રણ વર્ષ બાદ એક જ દિવસમાં આટલો મોટો ઉછાળો જોવા મળ્યો છે. છેલ્લી વખત શેરબજારમાં આટલો મોટો ઉછાળો 1 ફેબ્રુઆરી 2021ના રોજ જોવા મળ્યો હતો.

આ વધારાને કારણે શેરબજારના રોકાણકારોને મોટો ફાયદો થયો છે. BSEના ડેટા અનુસાર, એક જ દિવસમાં 13.78 લાખ કરોડ રૂપિયા માર્કેટના રોકાણકારો પાસે આવ્યા છે. એક્ઝિટ પોલના આંકડા 1 જૂનના રોજ આવ્યા હતા. જેમાં એવો સંકેત આપવામાં આવ્યો હતો કે મોદી સરકાર ફરી એકવાર દેશમાં જંગી બહુમતી સાથે સત્તામાં આવી શકે છે. જેના કારણે શેરબજારમાં જબરદસ્ત તેજીનું વાતાવરણ જોવા મળ્યું હતું.

આ તેજીની અસર રિલાયન્સ ઇન્ડસ્ટ્રીઝ, TCS, HDFC બેન્ક, SBI, LIC જેવી દેશની ટોચની 10 કંપનીઓમાં જોવા મળી હતી. બીજી તરફ અદાણી ગ્રુપની 10 કંપનીઓએ સારો ગ્રોથ દર્શાવ્યો હતો. માહિતી અનુસાર, અદાણી ગ્રૂપનું માર્કેટ કેપ રૂ. 20 લાખ કરોડને વટાવી ગયું છે. ચાલો જોઈએ કે શેરબજારમાં કેવા પ્રકારના આંકડા જોવા મળ્યા છે.

બોમ્બે સ્ટોક એક્સચેન્જનો મુખ્ય સૂચકાંક સેન્સેક્સ 2,507.47 પોઈન્ટ અથવા 3.39 ટકાના ઉછાળા સાથે રેકોર્ડ 76,468.78 પોઈન્ટ પર બંધ રહ્યો હતો. છેલ્લા ત્રણ વર્ષમાં એક દિવસમાં આ સૌથી મોટો વધારો છે. છેલ્લી વખત 1 ફેબ્રુઆરી 2021ના રોજ શેરબજારમાં લગભગ 5 ટકાનો ઉછાળો જોવા મળ્યો હતો. ટ્રેડિંગ દરમિયાન ઈન્ડેક્સ એક તબક્કે 2,777.58 પોઈન્ટ વધીને રેકોર્ડ 76,738.89 પોઈન્ટ પર પહોંચ્યો હતો. બીજી તરફ, નેશનલ સ્ટોક એક્સચેન્જનો નિફ્ટી પણ 733.20 પોઈન્ટ્સ અથવા 3.25 ટકા ઉછળીને 23,263.90 પોઈન્ટના સર્વોચ્ચ સ્તરે બંધ રહ્યો હતો. ટ્રેડિંગ દરમિયાન, તે 808 પોઈન્ટ અથવા 3.58 ટકા વધીને રેકોર્ડ 23,338.70 પોઈન્ટ પર પહોંચ્યો હતો.

કયા શેરોમાં ઉછાળો જોવા મળ્યો?

રિલાયન્સ ઈન્ડસ્ટ્રીઝ, આઈસીઆઈસીઆઈ બેંક, એચડીએફસી બેંક અને સ્ટેટ બેંક ઓફ ઈન્ડિયા જેવા મોટા શેરોમાં મજબૂત વૃદ્ધિ જોવા મળી છે. શેરબજારમાં ઉછાળા સાથે અદાણી ગ્રૂપની કંપનીઓના શેરમાં સોમવારે પણ જોરદાર ઉછાળો જારી રહ્યો હતો. અદાણી પાવરના શેરમાં લગભગ 16 ટકાનો ઉછાળો નોંધાયો હતો. NSE શેર્સની વાત કરીએ તો અદાણી પોર્ટના શેર 10.62 ટકાના ઉછાળા સાથે બંધ થયા છે. જ્યારે SBIના શેરમાં 9.48 ટકાનો વધારો જોવા મળ્યો હતો. એનટીપીસી અને પાવર ગ્રીડના શેર 9 ટકાથી વધુના વધારા સાથે બંધ થયા છે. ONGCના શેરમાં લગભગ 7.50 ટકાનો વધારો જોવા મળ્યો છે.

રોકાણકારોને રૂ. 13.78 લાખ કરોડનો ફાયદો થયો
શેરબજારના રોકાણકારોને સોમવારે મોટો ફાયદો થયો. ડેટા અનુસાર, BSEનું માર્કેટ કેપ રૂ. 4,25,91,511.54 કરોડ હતું. જ્યારે શુક્રવારે BSEનું માર્કેટ કેપ 4,12,12,881.14 કરોડ રૂપિયા જોવા મળ્યું હતું. આનો અર્થ એ થયો કે બોમ્બે સ્ટોક એક્સચેન્જના માર્કેટ કેપમાં રૂ. 13,78,630.4 કરોડનો વધારો થયો છે. જો કે શેરબજારમાં સતત બીજા દિવસે ઉછાળો જોવા મળ્યો છે. મતલબ કે શેરબજારના રોકાણકારોએ બે દિવસમાં રૂ. 15,55,283.62 કરોડનો નફો કર્યો છે.