મને અને મારી રમતને સમજે તેવો પુરુષ ગમશે: સ્મૃતિ મંધાના

ભારતીય ક્રિકેટ ટીમના યુવા સ્ટાર ક્રિકેટર સ્મૃતિ મંધાના અને ઈશાન કિશન હાલમાં સદીના મહાનાયક અમિતાભ બચ્ચનના પ્રખ્યાત શોમાં જોવા મળ્યા હતા. કોન બનેગા કરોડપતિના આ એપિસોડમાં સ્મૃતિ મંધાના અને ઈશાન કિશન બોલિવૂડના અમિતાભ બચ્ચન સાથે મજાક-મસ્તી કરતા જોવા મળ્યા હતા. તેમના વીડિયો સોશિયલ મીડિયા પર વાયરલ થઈ રહ્યા છે.
સ્મૃતિ મંધાના મહિલા ક્રિકેટ જગતની સુંદર મહિલા ક્રિકેટર્સમાંથી એક છે. સ્મૃતિ મંધાના કૌન બનેગા કરોડપતિની હોટ સીટ પર બેઠી ત્યારે પ્રેક્ષકોમાં બેઠેલા એક યુવાન ચાહકે પૂછ્યું, સ્મૃતિ મેડમ. ઇન્સ્ટાગ્રામ પર તમારા ઘણા પુરૂૂષ ફોલોઅર્સ છે. તમને પુરૂૂષમાં કયો ગુણ ગમે છે?
આ સમય દરમિયાન, ઈશાન અને બિગ બીની પ્રતિક્રિયા જોવા જેવી હતી, જ્યારે મંધાના દંગ રહી ગઈ હતી. ઈશાન હસવાનું રોકી ન શક્યો ત્યારે અમિતાભ બચ્ચને પૂછ્યું, તમે પરિણીત છો? અને ચાહકે જવાબ આપ્યો, ના સર. તેથી જ હું પૂછું છું. જે બાદ મંધાનાએ ખૂબ જ શાનદાર જવાબ આપ્યો, જેનો વીડિયો હવે સોશિયલ મીડિયા પર વાયરલ થઈ રહ્યો છે.
સ્મૃતિ મંધાનાએ કહ્યું: મને આવા પ્રશ્નની અપેક્ષા નહોતી. પણ ચાલો, સારો છોકરો બનવું સૌથી અગત્યનું છે. તેણે મારું ધ્યાન રાખવું જોઈએ અને મારી રમત સમજવી જોઈએ. આ બે મુખ્ય ગુણો છે જે તેની પાસે હોવા જોઈએ. કારણ કે એક છોકરી હોવાને કારણે હું તેને આટલો સમય આપી શકીશ નહીં.
તેણે આ સમજવું જોઈએ અને મારી કાળજી લેવી જોઈએ. આ એવી બાબતો છે જે મારી સર્વોચ્ચ પ્રાથમિકતા છે. આ એવા ગુણો છે જે હું મારા જીવનસાથીમાં શોધીશ.