દિલ્હી ઈન્ટરનેશનલ એરપોર્ટ પર વિજળી ગૂલ!!! મુસાફરો પરેશાન, ફ્લાઈટ્સ પણ મોડી પડી

દિલ્હીના ઈન્દિરા ગાંધી ઈન્ટરનેશનલ એરપોર્ટ પર આજે અડધા કલાકથી વધુ સમય માટે વિજળી ગૂલ થઈ હતી. લાંબા સમય સુધી વિજળી ગૂલ થવાના કારણે એરપોર્ટ પર અરાજકતા જોવા મળી હતી. મુસાફરોની સાથે સ્ટાફ પણ પરેશાન થઈ ગયો હતો. ચેક-ઈનથી લઈને બોર્ડિંગ સુધીના તમામ કામો ઠપ્પ થઈ ગયા હતા. આ કાપને કારણે ફ્લાઈટને પણ અસર થઈ હતી. ઘણી ફ્લાઈટ્સ મોડી પડી હતી.

દિલ્હી એરપોર્ટ પર લગભગ 2.30 વાગ્યે વીજળીનો પુરવઠો બંધ કરી દેવામાં આવ્યો હતો. આ સમય દરમિયાન તમામ સ્કેનર મશીનો બંધ થઈ ગયા, તમામ સિસ્ટમ બંધ થઈ ગઈ અને સેન્ટ્રલાઈઝ્ડ એસી પણ બંધ થઈ ગયું. સ્કેનીંગ મશીનો બંધ હોવાથી એન્ટ્રી ગેટ પર જ લાંબી કતારો લાગી હતી અને મુસાફરોને ગરમીમાં હાલાકી ભોગવવી પડી હતી. સમગ્ર સિસ્ટમ બંધ હોવાને કારણે એરપોર્ટના કર્મચારીઓ પણ વીજ પુરવઠો શરૂ થવાની રાહ જોતા જોવા મળ્યા હતા.

ફ્લાઇટમાં વિલંબ

એરપોર્ટ પર વીજ પુરવઠો ખોરવાઈ જવાને કારણે ઘણી ડોમેસ્ટિક અને ઈન્ટરનેશનલ ફ્લાઈટને અસર થઈ છે. આ સમય દરમિયાન, મુસાફરો ન તો સુરક્ષા તપાસ પૂર્ણ કરી શક્યા કે ન તો ચેક ઇન કરી શક્યા. જ્યાં સુધી વીજ પુરવઠો બંધ રહ્યો હતો ત્યાં સુધી ફ્લાઈટ ઓપરેશનને પણ અસર થઈ હતી. તેમજ તમામ કામોમાં વિલંબને કારણે આગામી કેટલાક કલાકો સુધી નિર્ધારિત ફ્લાઇટમાં વિલંબ થવાની સંભાવના છે.

આ સુવિધાઓ અટકી પડી હતી

એરપોર્ટ પર થોડો સમય વીજ પુરવઠો ખોરવાયા બાદ ફરી પુરવઠો ચાલુ કરવામાં આવ્યો હતો પરંતુ ત્યાં સુધીમાં સમગ્ર વ્યવસ્થા થંભી ગઈ હતી. આ પછી, સમગ્ર સિસ્ટમને પુનઃપ્રારંભ કરવામાં ઘણો સમય લાગ્યો. જેના કારણે મુસાફરોનો ઘણો સમય વેડફાયો છે. પાવર કટ દરમિયાન, ચેક-ઇન સિસ્ટમની તમામ કામગીરી, સુરક્ષા તપાસ માટે ઉપયોગમાં લેવાતા ડોર ફ્રેમ્સ (મેટલ ડિટેક્ટર), ઇમિગ્રેશન બ્યુરો અને એરોબ્રિજને અસર થઈ હતી.

દિલ્હી હાલ આકરી ગરમીના કારણે અનેક સમસ્યાઓનો સામનો કરી રહ્યું છે. આમાં સૌથી મોટું સંકટ ભારે ગરમીનું છે, બીજું સૌથી મોટું સંકટ પાણીનું છે અને ત્રીજું સૌથી મોટું સંકટ વીજળીનું છે. દિલ્હી છેલ્લા કેટલાક દિવસોથી પાવર કટની સમસ્યાનો સામનો કરી રહ્યું છે. મધ્ય અને પૂર્વ દિલ્હીના વિસ્તારોમાં આ સંકટ ચાલુ છે.