હું તને જીવવા નહીં દવ, તું જિંદગીમાંથી ગયો, સસરાને જમાઇએ આપી ધમકી

નાનામવા સર્કલે કવાર્ટરમાં રહેતી પરિણીતા માવતેર આવતી રહેતા થઇ માથાકૂટ

છરી બતાવી કહયું, આટલી જ વાર લાગે: બે પોલીસ મથકમાં નોંધાતા ગુના

કાલાવડ રોડ પર લક્ષ્મીના ઢોરા પાસે રહેતા વૃધ્ધને તેમના જમાઇએ મારી નાખવાની ધમકી આપતા તાલુકા અને યુનિવર્સીટી પોલીસમાં ગુનો નોંધવામાં આવ્યો છે.

બનાવની પ્રાપ્ત વિગતો અનુસાર, લક્ષ્મીના ઢોરે રહેતા બાવનજીભાઇ રામાભાઇ બગડા (ઉ.વ.61)એ તેમના જમાઇ દિનેશભાઇ ઉતમભાઇ ચૌહાણ (રહે.નાનામવા સર્કલ આવાસ કર્વાટર) વિરૂદ્ધ ફરિયાદ નોંધાવી છે. બાવનજીભાઇએ ફરિયાદમાં જણાવ્યું હતું કે, તેમની દીકરી ભાવના જે નાનામવા સર્કલ પાસે કર્વાટરમાં રહેતા દિનેશ સાથે લગ્ન થયા હતા તેમને સંતાનમાં બે દીકરી છે. દિનેશ અવારનવાર ભાવના પર શંકા કરતાં ગઇકાલે તેણી ઘર મુકી પિતાને ત્યાં આવી ગઇ હતી. જે બાદ પતિ દિનેશભાઇને જાણ થતાં તે પોતાની બંન્ને દીકરીઓ સાથે આવી તમારા લીધે જ અમારે દંપતીને ઝઘડા થાય છે અને જેને લીધે પત્ની ભાવના ઘરેથી જતી રહી છે. તમે જ મદદ કરો છો કહી છરી કાઢી તુ સવારે કામે જવા નીકળીશ એટલે તને જાનથી મારી નાખીશ તેમ કહી ધમકી આપી હતી.

બીજી ફરિયાદમાં જણાવ્યું હતું કે, દીકરી ભાવના પતિના ત્રાસથી ઘરે એકલી આવી જતા બંન્ને પુત્રીઓને લેવા તાલુકા પોલીસની મદદ લઇ જમાઇ દિનેશની ઘરે પહોંચતા તે ત્યાંથી બંને પુત્રીને લઇ જતો રહ્યો હતો અને તેમણે વોટસએપમાં વોઇસ મેસેજ મોકલ્યો કે તારી દીકરીનું તે ઘર બગાડયુ છે તને હું જીવવા નહીં દઉં કાલ સુધીમાં તને મારી નાખીશ તેમ કહી જાનથી મારી નાખવાની ધમકી આપી હતી.