સલાયા બંદરમાં યુવાન પર 4 શખ્સનો હુમલો

ખંભાળિયા તાલુકાના સલાયા ગામે રહેતા અને વહાણવટી વ્યવસાય સાથે સંકળાયેલા સાદિક સુલતાનભાઈ સુંભણીયા નામના 22 વર્ષના મુસ્લિમ વાઘેર યુવાન તેમના પિતા સુલતાનભાઈ સાથે સલાયા બંદર ખાતે લાંગરવામાં આવેલા વહાણ પાસે આવ્યા હતા. ત્યાં આરોપી એવા સલાયા ગામના રહીશ હુસેન ઓસમાણ ભાયા નામના શખ્સએ ફરિયાદી સાદીકને તેઓના લાંગરેલા વહાણમાંથી છેડા આપવાનું કહેતા તેમણે વરસાદના કારણે છેડા આપવાની ના કહી હતી. જેથી ઉશ્કેરાયેલા હુસેન ઓસમાણ સાથે મહેબુબ હુસેન ભાયા, આમીન હુસેન ભાયા અને ઈમરાન હુસેન ભાયા નામના ચાર શખ્સોએ તેમને બિભત્સ ગાળો કાઢી, જાનથી મારી નાખવાની ધમકી આપતા આ અંગે સલાયા મરીન પોલીસ મથકમાં જુદી જુદી કલમ હેઠળ ગુનો નોંધવામાં આવ્યો છે.

પરણીતાને ત્રાસ
ઓખાના પોશીત્રા ખાતે હાલ રહેતી અને હઠિયાભા ભીયાભા માણેકની 30 વર્ષની પરિણીત પુત્રી હીરાબેન ભરતભા સુમણીયાને તેણીના લગ્ન જીવન દરમિયાન પતિ ભરતભા થોર્યાભા સુમણીયા અને સાસુ ગોરીબેન થોર્યાભા સુમણીયા દ્વારા શારીરિક અને માનસિક દુ:ખ, ત્રાસ આપવામાં આવતા બનાવ અંગે ઓખા મરીન પોલીસ મથકમાં માતા-પુત્ર સામે જુદી જુદી કલમ હેઠળ ગુનો નોંધવામાં આવ્યો છે.

યુવાન ઉપર પાઇપ વડે હુમલો
ભાણવડ તાલુકાના કૃષ્ણગઢ ગામે રહેતા મુકેશભાઈ કેશુભાઈ સોલંકી નામના 29 વર્ષના યુવાન ઉપર લોખંડના પાઈપ વડે હુમલો કરી, ઇજાઓ કરી અને તેમજ ઢીકા-પાટુનો માર મારી, જાનથી મારી નાખવાની ધમકી આપવા સબબ આ જ ગામના જેન્તી હરદાસ સોલંકી સામે ભાણવડ પોલીસ મથકમાં ગુનો નોંધાયો છે.આરોપી જેન્તીના મકાનમાં તેના કુટુંબી ભાઈ રોહિત હરદાસ સોલંકી રહેતા હોય અને તેના ઘરેથી પોલીસે દેશી દારૂૂ પકડ્યો હોવાથી આરોપીએ ફરિયાદી મુકેશભાઈને આ દેશી દારૂૂ તે પકડાવેલ છે- તેમ કહી, હુમલો કર્યો હોવાનું પોલીસ ફરિયાદમાં જાહેર થયું છે. જે અંગે ભાણવડ પોલીસે જેન્તી હરદાસ સોલંકી સામે જુદી જુદી કલમ હેઠળ ગુનો નોંધી, જરૂરી કાર્યવાહી કરી હતી.