હવે તમારી થાળી થશે સસ્તી / લોટ અને દાળ બાદ હવે સરકાર ભારત બ્રાંડ હેઠળ ચોખાનું કરશે વેચાણ, મોંઘવારી વચ્ચે સસ્તો સામાન આપવાની યોજના

સરકાર હવે ભારત બ્રાન્ડ હેઠળ 25 રૂપિયા પ્રતિ કિલોના ભાવે ચોખાનું વેચાણ કરશે. તેનું વેચાણ નેશનલ એગ્રીકલ્ચરલ કોઓપરેટિવ માર્કેટિંગ ફેડરેશન ઓફ ઈન્ડિયા (NAFED), નેશનલ કોઓપરેટિવ કન્ઝ્યુમર ફેડરેશન (NCCF) અને કેન્દ્રીય ભંડાર આઉટલેટ્સ દ્વારા કરવામાં આવશે.

એક વરિષ્ઠ સરકારી અધિકારીના જણાવ્યા અનુસાર, આ પગલું ચોખાની વધતી કિંમતોને નિયંત્રિત કરવા માટે લેવામાં આવી રહ્યું છે. સરકાર પહેલેથી જ ભારત બ્રાન્ડ હેઠળ લોટ અને દાળનું વેચાણ કરે છે. નવેમ્બરમાં ખાદ્યપદાર્થોના ભાવમાં 10.27 %નો વધારો થયો હતો, જેના કારણે નવેમ્બર મહિનામાં ખાદ્યપદાર્થોનો ફુગાવો વધીને 8.70 % થયો હતો. અગાઉના મહિનામાં તે 6.61 % હતો. કુલ ગ્રાહક ભાવ બાસ્કેટમાં ખાદ્ય ફુગાવાનો હિસ્સો લગભગ અડધો છે.

છેલ્લા કેટલાક મહિનામાં, ફૂડ કોર્પોરેશન ઓફ ઈન્ડિયા (FCI) દ્વારા હાથ ધરવામાં આવેલા ઈ-ઓક્શન દ્વારા ખુલ્લા બજારમાં વેચાણ વધારીને ઘઉંના વધતા ભાવને અંકુશમાં લેવામાં સરકાર સફળ રહી છે. જો કે, આ સમયગાળા દરમિયાન ચોખાની ખરીદી ન્યૂનતમ રહી છે. આવી સ્થિતિમાં, 2024 માં યોજાનારી સામાન્ય ચૂંટણીઓને ધ્યાનમાં રાખીને તેની કિંમતોમાં વધારો સરકાર માટે મુશ્કેલી ઊભી કરી શકે છે.

FCIએ તાજેતરમાં જ ચોખા માટેના તેના OMSS નિયમોમાં થોડો સુધારો કર્યો છે, તેમાં થોડી રાહત આપી છે. બિડર દ્વારા બોલી લગાવી શકાય તેવા ચોખાનો લઘુત્તમ અને મહત્તમ જથ્થો અનુક્રમે 1 મેટ્રિક ટન અને 2000 મેટ્રિક ટન નક્કી કરવામાં આવ્યો છે. બજારમાં અનાજનો પુરવઠો વધારવા માટે OMSS હેઠળ ચોખાનું વેચાણ વધારવા માટે આ પગલું લેવામાં આવ્યું છે.