અનેક સ્થળે EVMમાં બીયુએરર દેખાઇ, તાબડતોબ મશીનો બદલાયા
ગુજરાતની 25 સહીત 10 રાજયો અને બે કેન્દ્ર શાસિત પ્રદેશોની 93 બેઠકો ઉપર આજે સવારથી મતદાન થઇ રહ્યું છે ત્યો અમદાવાદ, નવસારી, રાજકોટ, ભાવનગર, જામનગર, જુનાગઢ, બનાસકાંઠા, લીંબડી અને કચ્છ સહીતના 25 જેટલા મત વિસ્તારોમાં ઇવીએમ ક્ષતિગ્રસ્ત થયાની ફરીયાદો થઇ હતી.
મળતી વિગતો મુજબ સવારે સાત વાગ્યાથી મતદારો મતદાન માટે ઉમટી પડયા હતા. પરંતુ કેટલાક સ્થળે ઇવીએમ ખોટકાતા મતદાન થોડો સમય માટે અટકાવવું પડયું હતું. જો કે, પાછળથી તંત્રએ ઇવીએમ બદલી રાબેતામુજબ મતદાન શરૂ કરાવ્યું હતું.
સરકારી સુત્રોમાંથી મળેલી વિગતો મુજબ જે ઇવીએમ ખોટવાયા છે તે પૈકી મોટાભાગના ઇવીએમમાં બીયુ નામની એરર દેખાઇ છે. જો કે, આ એરર સહીતની ટેકનીકલ ક્ષતિ દુ કરી અને જરૂર પડે ત્યાં નવા ઇવીએમ મુકીને મતદાન આગળ ધપાવાયું હતું. સવારે પ્રથમ બે કલાકના મતદાન દરમિયાન ગુજરાતની તમામ પચીસેય બેઠકો ઉપર ઇવીએમ ખોટવાયાની ફરીયાદો મળી હતી.