ભાવનગર મનપાના અધિકારીએ રાજકોટની યુવતીને લગ્નની લાલચ આપી દેહ અભડાવ્યો

ભાવનગર મહાનગરપાલિકાના અધિકારીએ લગ્નના વચનો આપી રાજકોટની યુવતિનો વારંવાર રાજકોટ અને ભાવનગરમાં દેહ અભડાવ્યો હોવાની ફરીયાદ નોંધાવી હતી.

ભાવનગર મહાનગરપાલિકાના વોટર વર્કસ તેમજ સોલીટ વેસ્ટ મેનેજમેન્ટ વિભાગમાં કાર્યપાલક ઇજનેર તરીકે ફરજ બજાવતા ફાલ્ગુન શાહ સામે એક 36 વર્ષીય મહિલાએ દુષ્કર્મ આચર્યું હોવાની ફરિયાદ નોંધાવતા ભારે ચકચાર મચી જવા પામી છે. ફરિયાદી મહિલાએ આરોપીએ તેને લગ્નની લાલચ આપી વારંવાર દુષ્કર્મ આચર્યું હોવાનું ફરિયાદમાં જણાવ્યું છે.

આ અંગે પ્રાપ્ત થયેલી માહિતી મુજબ ફાલ્ગુનભાઈ મહેન્દ્રભાઈ શાહ (રહે.પદમશ્રી એપાર્ટમેન્ટ, ઘરશાળા પાસે, વાઘાવાડી રોડ) ભાવનગર મહાનગર પાલિકામાં વોટર વર્કસ તેમજ સોલીટ વેસ્ટ મેનેજમેન્ટ વિભાગમાં કાર્યપાલક ઈજનેર તરીકે ફરજ બજાવે છે. ભાવનગર શહેરની એક પરણીત મહિલાએ નિલમબાગ પોલીસ સ્ટેશનમાં ફાલ્ગુન શાહ સામે ફરિયાદ નોંધાવી હતી કે,ફાલ્ગુન શાહે તેને લગ્નની લાલચ આપી તેની સાથે શારિરીક સબંધ બાંધ્યો હતો અને ત્યાર બાદ તેણે લગ્ન કરવાની ના કહી છે.

પોલીસે આ બનાવ અંગે આરોપી સામે ગુનો દાખલ કરી વધુ તપાસ હાથ ધરી છે. પ્રાપ્ત થયેલી માહિતી મુજબ ફરિયાદી અને આરોપી બન્ને ચાર વર્ષથી સંપર્કમાં હતા અને તેમની વચ્ચે પ્રેમ સબંધ બંધાયા બાદ આરોપી મહિલાને સતત લગ્નની લાલચ આપતો હતો અને તેનું શારિરીક શોષણ કરતો હતો અને આખરે તેણે લગ્નની ના કહી હતી. આમ, કોર્પોરેશનના અધિકારી સામે દુષ્કર્મની ફરિયાદ નોંધાવતા ચકચાર પામી છે.